Գլոբալ ինտերնետի դարաշրջանը, հնարավոր է, մոտենում է ավարտին՝ Արեւելքի եւ Արեւմուտքի միջեւ աճող լարվածության պատճառով։ Այս մասին Charles Stanley ընկերության վերլուծանբան Հարի Ուայթը գրել է Daily Telegraph-ում։

Այնպիսի երեւույթներ, ինչպիսիք են հովանավորչությունը, նացիոնալիզմը, անվտանգության հարցում մտավախությունը, կարող են հանգեցնել նրան, որ ինտերնետը պառակտվի, քանի որ առանձին երկրներ ուզում են վերահսկել այն։

Արդյունքը կարող է լինել այն, որ գլոբալիզացիան կսառեցվի կամ հետ կընկնի, վնաս կհասցվի միջազգային առեւտրին, եւ արեւմտյան ընկերությունների համար կփակվեն որոշ շուկաներ։

Google-ի նախկին ղեկավար Էրիկ Շմիդտը կարծում է, որ իրադարձությունների նման զարգացումը ոչ միայն հնարավոր է, այլեւ տեղի կունենա առաջիկա 10-15 տարիների ընթացքում։ Նրա խոսքերով՝ ինտերնետը կբաժանվի երկու մասի, մեկը կվերահսկվի ԱՄՆ-ի, մյուսը՝ Չինաստանի կողմից՝ տեղեկացնում է BBC-ն։

Ոմանք էլ կարծում են, որ հնարավոր է նաեւ եվրոպական ինտերնետի առաջացում, քանի որ ԵՄ-ն ավելի շատ է մտահոգված օգտատերերի անձնական տվյալներով եւ ինտերնետ-ընկերությունների համակարգումով, քան Վաշինգտոնը։