Բրիտանիան եւ Եվրամիությունը պետք է պատրաստվեն բրեքսիթի հարցով երկրորդ հանրաքվեին, քանի որ խորհրդարանը, հավանաբար, այս հարցում չի կարողանա համաձայնության հասնել: Այս մասին հայտարարել է երկրի նախկին վարչապետ Թոնի Բլերը, փոխանցում է Reuters-ը:
Բրյուսելում ԵՄ առաջնորդների հետ հանդիպմանը ելույթ ունենալիս Բլերը նշել է, որ իրենք պետք է առաջարկեն բարեփոխել ԵՄ-ն, որպեսզի Բրիտանիայի համար ավելի գրավիչ դարձնեն: «Հիմա պետք է նախապատրաստական ժամանակ լինի՝ խորհրդարանը պետք է համոզված լինի, որ կկարողանա ողջամտորեն մեկը մյուսի հետեւից քննարկել համաձայնության հասնելու կամ հանրաքվեի տարբերակները, Եվրոպան պետք է համոզվի, որ եթե Բրիտանիան պատրաստ է նորից մտածել, եւ Եվրոպան նույնպես պատրաստ է դա անել»,- հայտարարել է նա:
ԵՄ բարեփոխման առաջարկը ցույց կտար, որ «Եվրոպայի եւ Մեծ Բրիտանիայի ղեկավարությունը լսել է նրանց հիմնական խնդիրները, ովքեր քվեարկել են բրեքսիթի օգտին, խնդիրները ոչ թե արհամարհելով, այլ այնպես լուծելով, որ վնաս չհասցնի»:
2016 թվականի հանրաքվեից հետո Բլերը մի քանի անգամ կոչ է արել բրեքսիթը չեղյալ հայտարարել:
Նա նշել է, որ Մեծ Բրիտանիան եւ ԵՄ-ն պատրաստվում են տնտեսության համար պոտենցիալ կործանարար բրեքսիթի՝ առանց որեւէ գործարքի: «Մենք տեղյակ ենք բրեքսիթի տարբերակներին: Խորհրդարանը պետք է որոշում ընդունի դրանցից մեկով: Եթե խորհրդարանը չի կարողանում, այն պետք է վերադառնա ժողովրդին»,- ասել է Թոնի Բլերը:
