Ընտրությունների օրը ՄԻՊ գրասենյակն ստացել է որոշակի ահազանգեր՝ կապված հաշմանդամություն ունեցող անձանց տեղափոխման հետ, ցուցակների ճշտման հետ։ Այս մասին, այսօր՝ դեկտեմբերի 14-ին, լրագրողների հետ զրույցում նշեց Մարդու իրավունքների պաշտպան Արման Թաթոյանը:
Նրա խոսքով, քվեարկությունն անցավ խաղաղ մթնոլորտում, առանց որեւէ լարվածության. «Կարեւոր էր դպրոցների եւ մանկապարտեզների ապաքաղաքականացման արդյունքներ արձանագրելը, որը արդեն արձանագրվել էր Երեւանի ընտրություններում»:
Թաթոյանը նշեց, որ ՄԻՊ գրասենյակը միայն ընտրությունների օրը ստացել է 89 ահազանգ. «Ուսումնասիրել ենք մոտ 900 հրապարակում, դրանցից առանձնացրել եւ որոշ հրապարակումներ ուղարկել են իրավապահ մարմիններին, սպասում ենք իրենց պարզաբանումներին, որպեսզի խնդիրները նշենք։
Այս ընտրություններն աչքի ընկան նրանով, որ համացանցում, սոցիալական մեդիայում կար ատելության խոսքի, վիրավորանքի աճ։ Դա մտահոգիչ է, եւ հիմա բոլորիս առաջնահերթ խնդիրը պետք է լինի դա վերացնելը։ Չի կարելի դա թույլ տալ, իսկ անհանդուրժողականությունը սոցիալական մեդիայում որքան ժամանակ է՝ շարունակվում է։ Ընտրություններն այդ առումով պետք է բաժանարար գիծ լինի, որ՝ վերջ, փակենք այդ էջն ընդհանրապես»: