Հեղափոխությունը դարձել է Երեւանի տրանսպորտային համակարգի շարունակվող կոլապսի պատճառը: Դեկտեմբերի 14-ին լրագրողների հետ հանդիպման ժամանակ այս մասին ասաց Հայաստանի Փոխադրողների միության նախագահ Հրանտ Եղիազարյանը:
Նրա խոսքով՝ նախորդ իշխանություններն արդեն մշակել էին նոր տրանսպորտային համակարգ, որը պետք է մոտ ժամանակում ներդրվեր, սակայն հեղափոխական գործընթացները եւ դրան հաջորդած քաղաքական փոփոխությունները հանգեցրին նրան, որ տրանսպորտի խնդիրը ոչ միայն չի լուծվում, այլ ավելի է խորանում: «Նոր տրանսպորտային ցանցը, որը պետք է ներդրվեր այս տարվա արդեն դեկտեմբեր-հունվարին, հնարավոր է, կսկսի գործել լավագույն դեպքում 2 տարուց հետո, իսկ վատագույն դեպքում՝ 4 տարի հետո»,- պարզաբանեց Եղիազարյանը:
Նա հավելեց, որ այս խնդրի լուծման համար միայն քաղաքական կամք է անհրաժեշտ, սակայն ոչ ոք չի պարզաբանում, թե այս ժամկետներն ինչի հետ են կապված: «Ես 2 անգամ նամակով դիմել եմ վարչապետին եւ մեկ անգամ Երեւանի քաղաքապետին, սակայն ոչ մի պատասխան չեմ ստացել: Գործող իշխանությունները խնդրի լուծման համար լավ ժառանգություն են ստացել, միջազգային փորձագետներ էին հրավիրվել, 850 հազար դոլար գումար էր վճարվել: Այդ դեպքում, ինչո՞ւ չի կարելի խնդիրը լուծել»,- հարց տվեց փորձագետը:
Հրանտ Եղիազարյանը շեշտեց, որ եթե իրավիճակն անփոփոխ մնա, ապա դեկտեմբերի վերջին եւս 117 միկրոավտոբուսներ օգտագործման համար ոչ պիտանի կդառնան: «Եթե ժամանակին ուղեվարձը մինչեւ 150 դրամ թանկացնելու դեմ բողոքներ չլինեին, ապա այսօր խնդիրը լուծված կլիներ: Իսկ հիմա արդեն մոտ 50 հազար ուղեւորներ ստիպված են 200 դրամ ծախսել նշանակման վայր հասնելու համար, քանի որ շատ տրանսպորտային ցանցեր շարքից դուրս են եկել եւ չեն գործում»,- արձանագրեց ՀԿ ղեկավարը:
