Հայաստանում ԱՄՆ դեսպանատան հայտարարությունը ոչ մի քաղաքական ենթատեքստ չի պարունակում: Դեկտեմբերի 15-ին լրագրողների հետ հանդիպման ժամանակ այս մասին ասաց Տուրիզմի հայկական ֆեդերացիայի նախագահ Մեխակ Ապրեսյանը:
Նրա խոսքով՝ սա զգոնության կոչի ստանդարտ ընթացակարգ է ամանորյա տոներին զբոսաշրջիկների հոսքի աճի ֆոնին:
«Սա ստանդարտ ընթացակարգ է, առավել եւս, որ լրացուցիչ պարզաբանում տրվեց, ուստի ոչ նպատակահարմար կլիներ Հայաստանի իշխանությունների կողմից այս առիթով որեւէ կոշտ դիրքորոշում հայտնելը»,- նշեց Մեխակ Ապրեսյանը:
Նա շեշտեց, որ երկրի զբոսաշրջային իմիջը գլխավորապես մեր հանրությունը պետք է ստեղծի, այդ թվում՝ լրատվամիջոցները եւ իրավապահ մարմինները:
«Հայաստանը եւ հայ ժողովուրդը մշտապես հռչակվել են իրենց հյուրասիրությամբ: Դրանից բացի, անվտանգության մակարդակի մասին շատ միջազգային կազմակերպություններ են հայատարարում: Մենք անվտանգության եւ բարյացակամության բարձր մակարդակ ենք ցույց տվել նույնիսկ «թավշյա հեղափոխության» ժամանակահատվածում, որը բացառապես խաղաղ բնույթ էր կրում: Շատ կարեւոր է, որ այդ իրադարձությունները լուսաբանվել են միջազգային լրատվամիջոցներով: Ավելին՝ երթերին մասնակցել են նաեւ մեծ թվով արտասահմանցի զբոսաշրջիկներ, ինչը հաստատում է իմ ասածը»,- նշեց Մեխակ Ապրեսյանը:
Հիշեցնենք, որ Երեւանում ԱՄՆ դեսպանատունը ԱՄՆ քաղաքացիներին կոչ էր արել ամանորյա տոների ժամանակ զգոն լինել՝ հայտարարություն տարածելով այն մասին, որ տոների ժամանակ նաեւ սպառնալիք գոյություն ունի անդրազգային ահաբեկչական կազմակերպությունների եւ առանձին անձանց կողմից, որոնք ոգեշնչված են ամբողջ Եվրոպայով մեկ ծայրահեղական գաղափարախոսությամբ:
Ի պատասխան այս հայտարարությանը՝ Հայաստանի ոստիկանությունից հիշեցրել են, որ բազմաթիվ միջազգային կազմակերպություններ Երեւանը համարել են անվտանգ քաղաք, իսկ ոստիկանությունն ու մյուս իրավապահ մարմիններն ունեն հնարավորություններ եւ միջոցներ, ու ամեն ինչ անում են այդ գնահատականի հաստատման եւ հանրային անվտանգության ապահովման համար: Տոնական օրերին հատկապես ոստիկանությունը մտադիր է աշխատել ուժեղացված ռեժիմով: