Շաբաթ առավոտյան Ֆրանսիայի իշխանությունները «դեղին բաճկոնավորների» բողոքի ցույցերի նախաշեմին մայրաքաղաքի Իլ դե Ֆրանս շրջանում ձերբակալել են 25 մարդու, հայտնում է Cnews հեռուստաալիքը:
Ոստիկանության տեղեկություններով՝ 10 մարդ ձերբակալվել է Փարիզում, եւս 15-ը՝ «ծայրամասերում նախազգուշական ստուգումների ընթացքում»:
Ավելի վաղ հաղորդվում էր Փարիզում 6 մարդու ձերբակալության մասին:
Ֆրանսիայի ՆԳ նախարար Քրիսթոֆ Կաստաներն, իր հերթին, Twitter-ում հայտնել է, որ ամբողջ օրվա ընթացքում «նախնական հսկողություն» կիրականացվի մայրաքաղաքի կայարաններում:
Հիշեցնենք, որ Ֆրանսիայում «դեղին բաճկոններ» շարժման բողոքի ցույցերը սկսվել են նոյեմբերի 17-ին, նրանք մասնավորապես հանդես են գալիս բենզինի գների բարձրացման դեմ: Զանգվածային ցույցերն ուղեկցվում են ոստիկանների եւ ցուցարարների բախումներով, ջարդարարությամբ ու մեքենաների հրկիզումներով, խանութների, բանկերի ավերմամբ: BFMTV-ի տեղեկություններով՝ Ֆրանսիայի իրավապահ մարմինները ցույցերի մեկնարկից սկսած ձերբակալել են ավելի քան 4,5 հազար մարդու, որոնցից 4,1 հազարը կալանավորվել է: