Պետերբուրգում ոստիկանները հետախուզում են անձանց խումբ, որոնք դեկտեմբերի 14-ին երկրում հնագույն Մարսյան դաշտում մարել են Անմար կրակը, որից վառվել էր Մոսկվայում Անհայտ զինվորի շիրիմի կրակը, հայտնում է ՏԱՍՍ-ը՝ վկայակոչելով Սանկտ Պետերբուրգի եւ Լենինգրադի մարզի ՆԳՆ Գլխավոր վարչության մամուլի ծառայության հայտարարությունը:
Նշվում է, որ ոստիկանության աշխատակիցները չարագործներին հայտնաբերելու եւ ձերբակալելու միջոցներ են ձեռնարկել:
Ավելի վաղ Սանկտ Պետերբուրգի դատարանը 10 հազար ռուբլով տուգանել էր 36-ամյա տղամարդու, ով մարդկանց ներկայությամբ Մարսյան դաշտում Անմար կրակի մեջ էր նետել սգո ծաղկեպսակները: Միջադեպը տեղի էր ունեցել օգոստոսի 7-ին: 2016 թվականի հուլիսին էլ ոստիկանները որոնում էին ապօրինի խնջույքի մասնակիցներին, որը կատարվել էր Մարսյան դաշտում գիշերային ժամին: Այդ ժամանակ մի քանի տղամարդիկ Անմար կրակի վրա խորոված էին պատրաստել:
Մարսյան դաշտի հուշահամալիրը երկրում այն սակավաթիվներից մեկն է, որը նվիրված է Փետրվարյան հեղափոխության զոհերին: Հեղափոխականների եղբայրական շիրիմների գրանիտե հուշարձանը այստեղ տեղադրվել է 1919 թվականի նոյեմբերի 7-ին: 1920-30-ական թվականներին այստեղ պուրակ է ստեղծվել, որտեղ մինչեւ 1933 թվականը հուղարկավորությունները շարունակվել են, մասնավորապես՝ Մարսյան դաշտում են հուղարկավորվել բոլշեւիկներ՝ Պետրոգրադի Արտակարգ կոմիտեի նախագահ Ուրիցկին եւ մամուլի կոմիսար Վոլոդարսկին:
