Ասիական զարգացման բանկի (ԱԶԲ) Կենտրոնական եւ Արեւմտյան Ասիայի, Մասնավոր հատվածի գործառնական եւ Կայուն զարգացման, կլիմայական փոփոխությունների բաժինների ղեկավարները Մանիլայում բացեցին ԱԶԲ-ի՝ մեկ ընդհանուր խորագրի ներքո կազմակերպված համատեղ միջոցառումը: Հայաստանից միջոցառմանը մասնակցում էր «Հայաստանի էլեկտրական ցանցեր» ընկերությունը (ՀԷՑ):
ՀԷՑ ընկերության գլխավոր տնօրեն Կարեն Հարությունյանը ներկայացրեց ընկերության 10-ամյա ներդրումային ծրագրի ընթացքը, անդրադարձավ դրա կարեւորությանը, ինչպես նաեւ ներկայացրեց ընկերության զարգացման հեռանկարները առաջիկա տարիների համար: Նա հատուկ շեշտեց ԱԶԲ-ի եւ մյուս միջազգային ներդրումային ֆինանսական կառույցների դերը եւ այն առանցքային պայմանները, որոնք իրենց մեծ դերակատարումն ունեն էլեկտրաէներգիայի առավել արդյունավետ եւ հուսալի բաշխիչ ցանց ունենալու գործում՝ նպաստելով երկրի տնտեսական աճին:
«Մենք ներկայացրեցինք Հայաստանը, էներգետիկ շուկայի կառուցվածքը, եւ, իհարկե, 2015թ. ի վեր՝ ընկերության կառավարումը ստանձնելուց հետո կատարված աշխատանքի արդյունքները, մեր առջեւ ծառացած մարտահրավերները, 10-ամյա ներդրումային ծրագիրը եւ առաջիկա տարիների զարգացման տեսլականը: Չափազանց կարեւոր էր նաեւ ԱԶԲ-ի հետ փորձի փոխանակումը», - նշեց ՀԷՑ ընկերության գլխավոր տնօրեն Կ.Հարությունյանը:
«Հայաստանի տնտեսության աճի համար կարեւոր է էլեկտրաէներգիայի առավել արդյունավետ եւ հուսալի բաշխիչ ցանցի առկայությունը: ՀԷՑ-ը էներգետիկ ոլորտում ռազմավարական դեր ունի, որը պետք է լուծի ոլորտի կարեւորագույն խնդիրներն ու նպատակները։ Մեր համագործակցությունը կաջակցի ՀԷՑ-ին ներդրումային ծրագրի իրականացման հարցում», - նշեց ԱԶԲ ներդրումային ծրագրերի ղեկավար Նարինե Ավետիսյանը:
