Փարիզում ոստիկանները «դեղին բաճկոնավորների» դեմ արցունքաբեր գազ են կիրառել, փոխանցում է «ՌԻԱ Նովոստի»-ն:
Այսօր Փարիզի կենտրոնում՝ Ելիսեյան դաշտերում ընթանում է բողոքի հերթական ցույցը: Մի քանի 100 մարդ հավաքվել է Հաղթական կամարի մոտ, որին հասանելիությունը փակված է: Նրանց կամարից հեռացնելու համար ոստիկաններն արցունքաբեր գազ են կիրառել:
Դրանից հետո ցուցարարները վանկարկումներով ուղղվել են Ելիսեյան դաշտեր, չնայած այս շրջանը եւս փակված է: Նրանցից ոմանք ձեռքներին բռնել են Ֆրանսիայի դրոշները, որի սպիտակ շերտը դեղին է ներկված՝ ի պատիվ «բաճկոնավորների»:
Այս ընթացքում շարունակում են Ելիսեյան դաշտեր գալ նոր ցուցարարներ:
Հիշեցնենք, որ Ֆրանսիայում «դեղին բաճկոններ» շարժման բողոքի ցույցերը սկսվել են նոյեմբերի 17-ին, նրանք մասնավորապես հանդես են գալիս բենզինի գների բարձրացման դեմ: Զանգվածային ցույցերն ուղեկցվում են ոստիկանների եւ ցուցարարների բախումներով, ջարդարարությամբ ու մեքենաների հրկիզումներով, խանութների, բանկերի ավերմամբ: BFMTV-ի տեղեկություններով՝ Ֆրանսիայի իրավապահ մարմինները ցույցերի մեկնարկից սկսած ձերբակալել են ավելի քան 4,5 հազար մարդու, որոնցից 4,1 հազարը կալանավորվել է:
