News
Լրահոս
News
Երեքշաբթի
Մարտ 19
Տեսնել լրահոսը

ՕԵԿ նախագահ Արթուր Բաղդասարյանը հեռանում է ակտիվ քաղաքականությունից՝ վայր դնելով նաեւ ՕԵԿ նախագահի լիազորությունները եւ իմ հետագա կուսակցական գործունեությունը: Այս մասին հայտարարություն է տարածել «Օրինաց երկիր» կուսակցությունը:

Հայտարարությունում, մասնավորապես, ասվում է.

«Այսօր տեղի ունեցավ ՕԵԿ արտահերթ համագումարը, որին մասնակցում էին ՕԵԿ տարածքային կառույցների ղեկավարաները՝ հանրապետության բոլոր մարզերից ու մայրաքաղաքից:

Բացելով նիստը Արթուր Բաղդասարյանը շնորհակալություն հայտնեց կուսակցության օգտին քվեարկած ավելի քան 12 հազար քաղաքացիներին, համախոհներին, գաղափարակիցներին, կառույցների ղեկավարներին եւ վերստին շնորհավորեց խորհրդարան անցած բոլոր ուժերին:

Ելույթ ունեցողները ընդգծեցին, որ «Օրինաց երկիր» կուսակցությունը վերջին 20 տարիների ընթացքում հանդիսանում է ՀՀ առավել ակտիվ քաղաքական ուժերից մեկը, որը 18 տարի շարունակ ներկայացված լինելով ՀՀ Ազգային Ժողովում ՕԵԿ-ը պայքարել է մեր քաղաքացիների սոցիալական պաշտպանության եւ բարեկեցության, ինչպես նաեւ արդարության եւ օրինականության ամրապնդման համար՝ հեղինակելով ավելի քան 250 օրենքներ, բազմաթիվ ժողովրդանպաստ ծրագրեր  եւ նախաձեռնություններ, որոնք նպաստել են հարյուր հազարավոր մեր քաղաքացիների խնդիրների լուծմանը:

ՕԵԿ համագումարը ի գիտություն  ընդունեց Արթուր Բաղդասարյանի՝ կուսակցության նախագահի լիազորությունների դադարեցման մասին հայտարարությունը:

«Սիրելի ժողովուրդ, հարգելի  պատվիրակներ,

Ես ցանկանում եմ հայտարարել, որ հեռանում եմ ակտիվ քաղաքականությունից՝ վայր դնելով նաեւ ՕԵԿ նախագահի լիազորությունները եւ իմ հետագա կուսակցական գործունեությունը: ՕԵԿ հիմնադրումից 20 տարի անց ես ուզում եմ շնորհակալություն հայտնել իմ բոլոր հայրենակիցներին, ինձ քննադատող ու մերժող, սիրող ու գնահատող մարդկանց, կրկին հայցել բոլորի ներողամտությունը իմ քաղաքական գործունեության ընթացքում ունեցած սխալների ու թերությունների համար, շնորհակալություն հայտնել իմ կատարած աշխատանքը գնահատողներին ու արժեւորողներին: Ցանկանում եմ երախտիքի խոսք հղել բոլոր լրագրողներին եւ զանգվածային լրատվության միջոցներին իմ գործունեությունը լուսաբանելու համար, առանձնահատուկ շնորհակալություն հայտնել իմ գաղափարակից ընկերներին եւ թիմակիցներին ու մեր ողջ ժողովրդին: 

Զբաղվելով հանրային գործունեությամբ կփորձեմ իմ հրապարակային առաջարկություններով նպաստել երկրում կուտակված եւ օրեցօր բազմացող խնդիրների լուծմանը: Ակտիվ քաղաքականություն կվերդառնամ ժողովրդի ցանկությամբ, երբ զգամ դրա կարիքն ու անհրաժեշտությունը: Աստված պահապան մեր ժողովրդին»,- նշել է Արթուր Բաղդասարյանը:

Համագումարը ՕԵԿ նախագահի պաշտոնում առաջադրեց եւ միաձայն քվեարկությամբ ընտրեց Հովհաննես Հովհաննիսյանին: ՕԵԿ փոխնախագահներ ընտրվեցին  Կարինե Սարգսյանը, Վահե Թորոսյանը եւ  Սիմոն Հակոբյանը»:

Նշենք, որ Հովհաննես Հովհաննիսյանը Հայաստանում Ֆրանսիական քոլեջ հիմնադրամի տնօրենն է, ընգրկված է եղել նաեւ ՕԵԿ նախընտրական ցուցակում, Վահե Թորոսյանը մամուլի խոսնակն է, Սիմոն Հակոբյանն էլ կուսակցության երիտթեւի ղեկավարը, իսկ ահա Կարինե Սարգսյանը Հեղինե Բիշարյանի դուստրն է:

!
Այս նյութը հասանելի է նաև   English and Русский
Տպել
Ամենաշատ