Ընտրություններից առաջ քաղաքական ուժերի միավորվելու հարցը ամենից շատ կախված էր «Քաղաքացիական պայմանագիր» կուսակցությունից, որը չցանկացավ որեւէ ուժի հետ միավորվել: Այս մասին մամուլի ասուլիսի ժամանակ նշեց Կառուցողական կուսակցության ղեկավար Անդրիաս Ղուկասյանը՝ անդրադառնալով հարցին, թե ինչու քաղաքական կուսակցությունները միասնական ճակատով հանդես չեկան ընտրություններում:
«Դա արտախորհրդարանական տիրույթում գլխավոր հարցն է: Իսկապես, կան շատ պատճառներ, թե ինչու տարբեր քաղաքական ուժեր իրար հետ դժվար են համագործակցում: Երբ ուզում ես հարսանիքի միջոցառումը լավ անցնի, պետք է մտածես, թե որ սեղանին ում ես նստացնում, որ բարեկամներին, որ չլինի այնպես, որ տոնական վիճակը չփչանա մարդկանց հակասությունների պատճառով: Նույնը քաղաքական դաշտում է: Ես հիմա վարում եմ բանակցություններ տարբեր քաղաքական ուժերի հետ եւ փորձում եմ գտնել այնպիսի կոնֆիգուրացիա՝ հաշվի առնելով բոլորի վերապահումները, թե ով ում հետ չի ուզում մի սեղանի նստել, որպեսզի մենք իսկապես ունենանք մի միավորում, որտեղ բոլոր փոքր ուժերը կարողանան ազդեցիկ սուբյեկտ լինել: Հիմա արտախորհրդարանական տիրույթում դա օբյեկտիվորեն ձեւավորվող գործընթաց է»,-ասաց նա:
Անդրիաս Ղուկասյանը հավելեց, որ այդ բանակցություններն ընթանում են «միավորում հանուն Սահմանադրական փոփոխությունների» սկզբունքի ներքո:
