Փարիզում Ելիսեյան դաշտերում բախումներ են սկսվել «դեղին բաճկոնավորների» բողոքի ցույցի մասնակիցների եւ ոստիկանների միջեւ, փոխանցում է «ՌԻԱ Նովոստի»-ն:
Ելիսեյան դաշտերում արդեն հազար մարդ է հավաքվել, սակայն մարդիկ շարունակում են ժամանել: Նրանք կանգնած են ոստիկանական շղթայի մոտ, որոնք փակել են անցումը Ելիսեյան պալատ: Ակտիվիստները կարգախոսներ են վանկարկում, ոմանք իրավապահների վրա քարեր եւ շշեր են նետում: Ի պատասխան նրանք մահակներով խփում են առավել ագրեսիվ ցուցարարներին:
Ավելի վաղ ոստիկանները «դեղին բաճկոնավորների» դեմ արցունքաբեր գազ էին կիրառել:
Հիշեցնենք, որ Ֆրանսիայում «դեղին բաճկոններ» շարժման բողոքի ցույցերը սկսվել են նոյեմբերի 17-ին, նրանք մասնավորապես հանդես են գալիս բենզինի գների բարձրացման դեմ: Զանգվածային ցույցերն ուղեկցվում են ոստիկանների եւ ցուցարարների բախումներով, ջարդարարությամբ ու մեքենաների հրկիզումներով, խանութների, բանկերի ավերմամբ: Վերջին տեղեկություններով՝ Ֆրանսիայի իրավապահ մարմինները ցույցերի մեկնարկից սկսած ձերբակալել են ավելի քան 4,5 հազար մարդու, որոնցից 4,1 հազարը կալանավորվել է: