Փարիզում Օպերայի հրապարակում դեղին բաճկոններով ցուցարարները խաղաղ հանրահավաքից հետո ոստիկանների վրա են նետել ներկերով գնդեր, իրադարձությունների վայրից հայտնում է ՏԱՍՍ-ը:
Ի պատասխան՝ ոստիկանությունը հիմնականում ոչ մի կերպ չի արձագանքում, միայն որոշ վայրերում են արմատական տրամադրված ցուցարարների ուղղությամբ հատուկ կսկծացնող սփրեյ ցողում: Իրավակարգի պահապանների վրա են նետում նաեւ ճայթռուկներ: Քիչ հեռվում հերթապահում է ոստիկանական հեծելազորը:
Փարիզի ոստիկանության վերջին տեղեկություններով՝ ձերբակալվածների թիվն անցել է 90-ից: BFM հեռուստաալիքը հայտնում է, որ նրանց թիվը կազմում է 92 մարդ, նրանցից 53-ը կալանավորված է: Ցույցերը շարունակվում են:
Հիշեցնենք, որ Ֆրանսիայում «դեղին բաճկոններ» շարժման բողոքի ցույցերը սկսվել են նոյեմբերի 17-ին, նրանք մասնավորապես հանդես են գալիս բենզինի գների բարձրացման դեմ: Զանգվածային ցույցերն ուղեկցվում են ոստիկանների եւ ցուցարարների բախումներով, ջարդարարությամբ ու մեքենաների հրկիզումներով, խանութների, բանկերի ավերմամբ: Ֆրանսիայի ՆԳՆ տեղեկություններով՝ ցույցերի մեկնարկից սկսած ձերբակալվել է ավելի քան 4,5 հազար մարդ, որոնցից 4,1 հազարը կալանավորվել է: