Տեր Ասողիկ քահանան Էջմիածնում այսօր տեղի ունեցած միջադեպի ժամանակ հարվածել է «Նոր Հայաստան, նոր հայրապետ» շարժման կին մասնակցին։ Այս մասին այսօր՝ դեկտեմբերի 15-ին, լրագրողների հետ զրույցում պնդեց «Նոր Հայաստան, նոր հայրապետ» նախաձեռնության անդամ Մերի Ավագյանը։
«Ամեն մեքենա շրջապատել էր մի 50 հոգի մարդ ու քարերով խփում էին, մեքենան օրորվում էր։ Մեր մեքենակի մեջ կար փոքրիկ բալիկ, բալիկը սկսեց լացել, ես դուռը բացեցի, դուրս եկա, ուզում էի ինչ–որ բան անել, որ էդ փոքրիկ բալիկին հանեինք։ Մեր մեքենային հարվածում էին եւ ես սկսեցի հեռախոսով նկարել։ Տեր Ասողիկը մոտեցավ եւ մի քանի անգամ ինձ խփեց, ուզում էր խլել հեռախոս, որ ես չնկարեմ, հետո գլխիս հարվածեց։ Ես չգիտեմ՝ իրենց նպատակն ինչ էր, բայց օրը ցերեկով, ոստիկանների ներկայությամբ հոգեւորականը հարձակվում է եւ խփում է»,–ասաց Մերի Ավագյանը։
Լրագրողի ճշտող հարցին, թե արդյոք վստահ է, որ իրեն Տեր Ասողիկ քահանան է իրեն հարածել, Մերի Ավագյանը պնդեց, որ ինքը ճանաչում է Տեր Ասողիկին եւ վստահ է, նա է եղել իրեն հարվածողը։
Մերի Ավագյանը լրագրողներին նաեւ իր ասածները փաստող տեսանյութ ներկայացրեց։
Նշենք, որ այսօր միջադեպ է տեղի ունեցել Էջմիածնում կաթողիկոսի հրաժարականը պահանջող «Նոր Հայաստան, նոր հայրապետ» շարժման մասնակիցների եւ կաթողիկոսի աջակիցների վրա։ Կաթողիկոսի աջակիցները ձվեր էին շպրտել, թրիքաջուր լցրել ակցիայի մասնակիցների վրա, մարմնական վնասվածքներ հասցրել եւ վնասել նրանց մեքենաները։ Միջադեպի մասնակիցներից 2 հոգի բերման էին ենթարկվել։
Էջմիածնում բախում է տեղի ունեցել կաթողիկոսի հրաժարականը պահանջողների եւ նրա աջակիցների միջեւ