Արդարադատության նախարարի պաշտոնակատար Արտակ Զեյնալյանը Գյումրիում տեղի ունեցած հավաքարար Ջուլիետա Ղուկասյանի դաժան սպանության մասին գործի մանրամասներին չի տիրապետում
Հիշեցնենք, որ կնոջ սպանության մեջ կասկածվում է ռուսական բազայի զինծառայողը:
Դեկտեմբերի 17-ին՝ մամուլի ասուլիսի ժամանակ, լրագրողը փորձեց պարզել, արդյոք Զեյնալյանին հայնտի է կասկածյալի գտնվելու վայրը.
«Ինձ ոչինչ հայտնի չէ: Դուք ավելի շատ տեղեկատվություն ունեք, քան արդարադատության նախարարն ի պաշտոնե կարող է ունենալ: Հարցի հասցեատերը դատախազությունն է, այլ ոչ թե ես», - ասաց Զեյնալյանը:
Պատասխանից հիասթափված լրագրողը փորձեց պազրել նախարարի պաշտոնակատարի կարծիքը դատախազության լռության վերաբերյալ: Ի պատասխան Զեյանլյանը նորից ասաց, որ իրավասու չէ պատասխանել եւ հարցի հասցեատերը դատախազությունն է:
Ավելի վաղ տեղեկացրել էինք, որ դեկտեմբերի 2-ին Գյումրու Սլաբոտկա կոչվող թաղամասում դաժան ծեծի էր ենթարկվել քաղաքապետարանի բնակկոմունալ եւ շրջակա միջավայրի պահպանության բաժնի բանվոր կանանցից մեկը:
Նախնական տեղեկությունների համաձայն՝ կինը վաղ լուսաբացին գնացել է աշխատանքի, նրան ինչ-որ մեկը հետապնդել է ու դաժանաբար ծեծել։ Տուժած կինը, ով 57 տարեկան է, տեղափոխվել է բժշկական կենտրոն՝ «գանգուղեղային փակ վնասվածք հարցականով» ախտորոշմամբ, սակայն կյանքը փրկել չի հաջողվել եւ ժամը ժ.11.30-ի սահմաններում հիվանդանոցում գրանցվել է նրա կենսաբանական մահը։
Դեպքի առթիվ Շիրակի մարզային քննչական վարչությունում հարուցվել է քրեական գործ՝ ՀՀ Քրեական օրենսգրքի 112-րդ հոդված 2-րդ մասի 14-րդ կետի հատկանիշներով, այն է՝ դիտավորությամբ առողջությանը ծանր վնասվածք պատճառելը, որն անզգուշությամբ առաջացրել է տուժողի մահը։
Ավելի վաղ Հայաստանում ՌԴ դեսպանատունը կտրականապես հերքել էր ռուս զինծառայողի հնարավոր առնչությունը սպանությանը: