Դեկտեմբերի 2-ին Գյումրիում 57-ամյա կնոջը դաժան ծեծի ենթարկելու մեջ մեղադրվող ռուս զինծառայողը շարունակում է պահվել ռուսական 102-րդ ռուսական ռազմաբազայում։ Այս մասին NEWS.am–ին հայտնեց զինծառայողի պաշտպան, փաստաբան Նարինե Ռշտունին։ Նա հրաժարվեց անդրադառնալ իր պաշտպանյալին առաջադրված մեղադրանքին՝ ասելով, որ չի համաձայնեցրել նրա հետ։
Նշենք, որ ռուս զինծառայողը ձերբակալվել է հայ իրավապահների կողմից և կալանավորվել Շիրակի մարզի ընդհանուր իրավասության դատարանի դատավոր Վահե Միսակյանի որոշմամբ և հանձնվել ռուսական ռազմաբազայի հսկողությանը։
Ավելի վաղ հայտնել ենք, որ դեկտեմբերի 2-ին Գյումրի քաղաքի Մայակովսկի փողոցի տներից մեկի դիմացից շտապօգնության մեքենայով «Գյումրի բժշկական կենտրոն» ՓԲ ընկերություն է տեղափոխվել 1961 թվականին ծնված Շիրակի մարզի բնակիչը, ով հիվանդանոցում մահացել է: Մահացածը Գյումրիի քաղաքապետարանի բնակկոմունալ բաժնի աշխատակից է:
Նա ընդգրկված է եղել Տիգրան Մեծ փողոցում աշխատող հավաքարարների բրիգադում: Նախնական տեղեկություներով՝ սպանությունը տեղի էր ունեցել այն ժամանակ, երբ կինը գնում էր աշխատանքի: Դեպքի առթիվ Շիրակի մարզային քննչական վարչությունում հարուցվել է քրեական գործ՝ ՀՀ Քրեական օրենսգրքի 112-րդ հոդված 2-րդ մասի 14-րդ կետի հատկանիշներով, այն է՝ դիտավորությամբ առողջությանը ծանր վնասվածք պատճառելը, որն անզգուշությամբ առաջացրել է տուժողի մահը։ Շիրակի մարզի ընդհանուր իրավասության դատարանի որոշմամբ ռուս զինծառայողը կալանավորվել է: