Արդարադատության նախարարի պաշտոնակատար Արտակ Զեյնալյանը «Սասնա ծռեր» խմբի անդամներին քաղբանտարկյալներ չի համարում։
Այսօր՝ դեկտեմբերի 17-ին, մամուլի ասուլիսի ժամանակ նա հիշեցրեց, որ խմբի մի քանի անդամներ մեղադրվում են սպանության մեջ եւ այդ հանգամանքը իր արտացոլումն է գտել համաներման մասին օրենքում, որում բացառություններ են կատարվել սպանության մեջ մեղադրվողների համար. «Հայաստանի Հանրապետությունը քաղաքացիների կյանքի իրավունքի երաշխավոր է եւ պետք է ապահովի այդ իրավունքի իրականացումը։ Սա նշանակում է նաեւ արդար քննություն եւ պատիժ»,–նշեց Զեյնալյանը։
Պատասխանելով խմբի նկատմամբ արդարության հարցին, նա շեշտեց՝ պատասխանը կտա դատարանը, իսկ մարդիկ իրավունք ունեն այս թվում դիմել ՄԻԵԴ. «Մենք ողջունում ենք ՄԻԵԴ–ում հարցերի լուծումը»,–հավելել է Զեյնալյանը։