Ղարաբաղի նախագահը պատահական չէր այցելել Հայաստան: Դեկտեմբերի 17-ին՝ մամուլի ասուլիսի ժամանակ, այս մասին ասաց «Ընդդեմ իրավական կամայականության» ՀԿ նախագահ, Հայաստանի մարդու իրավունքների առաջին պաշտպան Լարիսա Ալավերդյանը:
Նրա խոսքով, որքան էլ իշխանությունները հավաստիացնում են, որ խոսքը Բակո Սահակյանի Երեւան կատարած հերթական այցի մասին է, դժվար է հավատալ, հատկապես հաշվի առնելով ԼՂՀ Պաշտպանության բանակի ղեկավարության կադրային փոփոխությունները: «Հայաստանում ընտրություններից հետո առաջին անգամ իմ հիշողության մեջ ոչ թե նրա ղեկավարն է Ղարաբաղ այցելում, այլ Ղարաբաղի նախագահն է այցելում Երեւան», - ասաց Ալավերդյանը:
Իրավապաշտպանը հավելեց, որ Ղարաբաղի բանակի հրամանատարի պաշտոնից ազատված Լեւոն Մնացականյանը լավ ժառանգություն է թողել, եւ այժմ նոր ղեկավարությունը պետք է գոնե կարողանա պահպանել գերատեսչության կազմակերպման ներկայիս մակարդակը:
Խոսելով վարչապետի պաշտոնակատար Նիկոլ Փաշինյանի վերջին հայտարարության մասին, որ Ղարաբաղի նախագահը պետք է «հանդարտեցնի» իր ենթականերին, Ալավերդյանն ասաց, որ չափազանց բացասաբար է վերաբերվում նման արտահայտություններին եւ դրանք անթույլատրելի է համարում՝ հաշվի առնելով տարածաշրջանի բարդ իրավիճակը, ինչպես նաեւ Ղարաբաղում ժողովրդավարության բարձր մակարդակը:
«Ղարաբաղը, որպես ժողովրդավարական պետություն, կարող է օրինակ ծառայել շատ ճանաչված պետությունների համար, որոնք իրենց ժողովրդավարական են հռչակել եւ Ստեփանակերտի ներքին գործերին միջամտելը, այն էլ այդ կերպ, անթույլատրելի է»: