Արցախի Հանրապետության արտաքին գործերի նախարար Մասիս Մայիլյանն ընդունել է Ավստրիայի Հանրապետությունում ՀՀ նորանշանակ արտակարգ եւ լիազոր դեսպան Արմեն Պապիկյանին։
Արցախի ԱԳՆ-ից NEWS.am-ին հայտնում են, որ կողմերը մտքեր են փոխանակել Արցախի միջազգային կապերի ընդլայնման հնարավորությունների եւ հեռանկարների շուրջ։
Հանդիպմանը քննարկվել են նաեւ միջազգային կազմակերպությունների, մասնավորապես՝ ԵԱՀԿ շրջանակներում համագործակցությանն առնչվող հարցերի լայն շրջանակ։
Զրուցակիցներն անդրադարձ են կատարել ադրբեջանա-ղարաբաղյան հակամարտության խաղաղ կարգավորման գործընթացում առկա իրավիճակին։ Կարեւորվել են կարգավորման գործընթացում դինամիկայի պահպանումը, ինչպես նաեւ Արցախի Հանրապետության մասնակցությամբ բանակցությունների եռակողմ ձեւաչափի վերականգնման անհրաժեշտությունը։