Հայկական կողմից պարզաբանում չկա՞: Սա ի՞նչ նոր անակնկալ է: Ֆեյսբուքյան էջում նման գրառում է արել քաղաքագետ Ստյոպա Սաֆարյանը՝ անդրադառնալով «Կոմսոմոլսկայա պրավդային» տված հարցազրույցում ՌԴ արտգործնախարար Սերգեյ Լավրովի այն հայտարարությանը, թե Մոսկվան ու Երեւանն ավարտում են մի փաստաթղթի նախապատրաստումը, որի համաձայն Հայաստանում բիոլաբորատորիաների տարածքում օտարերկրյա զինվորականներ չեն լինի։
«Հայկական կողմից պարզաբանում չկա՞: Սա ի՞նչ նոր անակնկալ է: Հենց սա ինքնիշխանության կրճատում է, երբ քեզ չեն թողնում քո անվտանգության կարիքները բավարարելու համար ռազմական, ռազմատեխնիկական համագործակցություն ունենալ այլ երկրների հետ: Հետաքրքիր է, թե նոր իշխանություններն ի՞նչ են հասկանում ինքնիշխանություն ասելով... Կանխավ ասեմ՝ նախկին իշխանության ներկայացուցիչներն ու սատելիտները թող լուռ մնան ու չքննադատեն. այս ամենի հիմքն էլ իրենք են դրել 2012թ. ՀԱՊԿ կանոնադրության արձանագրություն ստորագրելով ու ԱԺ-ում բոլորով միասին (ՀՀԿ, ԲՀԿ, ՕԵԿ, ՀԱԿ) վավերացնելով, որի համաձայն առանց ՀԱՊԿ համաձայնության Հայաստանն իրավունք չունի հյուրընկալել օտարերկրյա ռազմական ենթակառուցվածք»,– գրել է Ստյոպա Սաֆարյանը։
Ավելի ուշ քաղաքագետն այս թեմայով ևս մեկ գրառում է արել. «Ենթադրենք Լավրովի ասածը բիոլաբորատորիաների մասին է: Ենթադրենք համաձայնում ենք, որ հանուն իրենց «հանգստության» պայմանագրում գրում ենք, որ ամեն բիոլաբորատորիայում նստում է մի ծոծ Սվետա, որը հաստիքով խաբար է տալիս, թե ով մտավ այնտեղ, դուրս եկավ, կամ տարին մեկ կամ երկու անգամ ինսպեկցիա է գալիս ստուգի, թե օտարեկրյա զինվորական այդ շենք մտել է, թե չի մտել.... Հանուն ինչի՞: Մեր դաշնակիցը նույն ձևով ստուգելո՞ւ է, թե Ադրբեջանում ու Նախիջևանում թուրք զինվորականներ մտնում են այդ երկրի օբյեկտներ, թե ոչ... Եթե մենք, ինչպես Լավրովն է ասում, թափանցիկ ենք աշխատում ու «երաշիք ենք տալիս, որ իրենց համար ռսկեր չեն ստեղծվի», իրենք պարտավորվո՞ւմ են մեզ համար ռիսկեր չստեղծել, օրինակ, Ադրբեջանին զենք չվաճառել, որը մեզ համա՞ր է ռիսկեր ստեղծում։ Ո՞վ է այս հարցերը երկկողմ օրակարգում դնում կամ դնելու»։