NEWS.am -ի տեղեկություններով՝ դեկտեմբերի 2-ին Գյումրիում 57-ամյա կնոջը դաժան ծեծի ենթարկելու մեջ մեղադրվող 23-ամյա Ա․ Ռ․-ն պայմանագրային հիմունքներով, որպես վարորդ-մեխանիկ է աշխատում ռուսական 102-րդ ռազմաբազայում։ Մեր տեղեկություններով՝ զինծառայողի մասնակցությունը դեպքին պարզվել է դատագենետիկական փորձաքննությամբ՝ զինծառայողի հագուստի վրայից վերցված մանրաթելերի միջոցով։
Նշենք, որ ռուս զինծառայողը ձերբակալվել է հայ իրավապահների կողմից եւ կալանավորվել Շիրակի մարզի ընդհանուր իրավասության դատարանի դատավոր Վահե Միսակյանի որոշմամբ եւ հանձնվել ռուսական ռազմաբազայի հսկողությանը։ Նրան մեղադրանք է առաջադրվել ՀՀ քրեական օրենսգրքի 112 հոդված 2-րդ մասի 14-րդ կետի հատկանիշներով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը։
Զինծառայողի շահերը ներկայացնում է փաստաբան Նարինե Ռշտունին, իսկ մահացած 57-ամյա Ջուլիետա Ղուկասյանի իրավահաջորդի ներկայացուցիչներն են Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, գրասենյակի փաստաբաններ Հայկ Հակոբյանը եւ Արայիկ Զալյանը:
Ավելի վաղ հայտնել ենք, որ դեկտեմբերի 2-ին Գյումրի քաղաքի Մայակովսկի փողոցի տներից մեկի դիմացից շտապօգնության մեքենայով «Գյումրի բժշկական կենտրոն» ՓԲ ընկերություն է տեղափոխվել 1961 թվականին ծնված Շիրակի մարզի բնակիչը, ով հիվանդանոցում մահացել է: Մահացածը Գյումրիի քաղաքապետարանի բնակկոմունալ բաժնի աշխատակից է: Նա ընդգրկված է եղել Տիգրան Մեծ փողոցում աշխատող հավաքարարների բրիգադում: Նախնական տեղեկություներով՝ սպանությունը տեղի էր ունեցել այն ժամանակ, երբ կինը գնում էր աշխատանքի:
Դեպքի առթիվ Շիրակի մարզային քննչական վարչությունում հարուցվել է քրեական գործ՝ ՀՀ Քրեական օրենսգրքի 112-րդ հոդված 2-րդ մասի 14-րդ կետի հատկանիշներով, այն է՝ դիտավորությամբ առողջությանը ծանր վնասվածք պատճառելը, որն անզգուշությամբ առաջացրել է տուժողի մահը։ Շիրակի մարզի ընդհանուր իրավասության դատարանի որոշմամբ ռուս զինծառայողը կալանավորվել է:
