Գյումրիում տեղակայված 102–րդ ռազմաբազայի ներկայացուցիչների և սահմանապահների հետ հանդիպումների ժամանակ մշտապես հորդորում ենք զինծառայողների կարգապահության հարցում լինել խիստ, հնարավոր ամեն ինչ անել նման դեպքերը բացառելու, քաղաքում հանգիստ մթնոլորտ ապահովելու համար: Այս մասին NEWS.am–ին ասաց Գյումրիի քաղաքապետ Սամվել Բալասանյանը՝ անդրադառնալով դեկտեմբերի 2–ին գյումրեցի 57–ամյա կնոջ սպանությանը, որի մեջ մեղադրվում է ռազմաբազայի 23–ամյա զինծառայող Ա.Ռ.–ն։
«Դատապարտում եմ նման դեպքերը: Եվս մեկ անգամ իմ ցավակցություններն եմ հայտնում այդ կնոջ ընտանիքի անդամներին: Նա մեր քաղաքի բնակիչն էր, մեր աշխատակիցը, որի հետ տեղի ունեցավ այդ սարսափելի, զարհուրելի դեպքը: Քաղաքապետարանն ամեն հարցում օգնեց, աջակցեց այս ընտանիքին»,– ասաց նա։
Այլ մեկնաբանություն քաղաքապետը հրաժարվեց անել՝ նշելով, որ գործը նախաքննության փուլում է։
Հիշեցնենք, որ դեկտեմբերի 2-ին Գյումրիում դաժան ծեծի հետեւանքով մահացել էր 57–ամյա մի կին։ Վերջինը Գյումրիի քաղաքապետարանի բնակկոմունալ բաժնի աշխատակից էր, ընդգրկված է եղել Տիգրան Մեծ փողոցում աշխատող հավաքարարների բրիգադում: Նախնական տեղեկություներով՝ սպանությունը տեղի էր ունեցել այն ժամանակ, երբ կինը գնում էր աշխատանքի:
Կնոջը ծեծելով սպանելու մեջ մեղադրվում է ռազմաբազայի մի զինծառայող։ Նրան մեղադրանք է առաջադրվել ՀՀ քրեական օրենսգրքի 112–րդ հոդված 2-րդ մասի 14-րդ կետի հատկանիշներով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը։ Շիրակի մարզի ընդհանուր իրավասության դատարանի որոշմամբ ռուս զինծառայողը կալանավորվել է: