ԱԺ պատգամավոր, ԵԿՄ նախկին նախագահ Մանվել Գրիգորյանի նկատմամբ քրեական գործի շրջանակում ՀՔԾ-ն խոշորացույցով զննել է այդ տարածքները, որոնց սեփականության վկայականները գտնվել են, որպեսզի տեսնի՝ հանցակազմ կա, թե չկա. արդյունքում քրեական հետապնդում չիրականացրեց: Այս մասին այսօր՝ դեկտեմբերի 18-ին, լրագրողների հետ հանդիպման ժամանակ նշեց ԱԺ պատգամավոր Մանվել Գրիգորյանի պաշտպան Լեւոն Բաղդասարյանը:
«Դրանից հետո ՀՔԾ-ն դա ուղարկեց, որ քաղաքացիաիրավական հարթության վրա պետական լիազոր մարմինները կամ ՏԻՄ մարմինները այն վիճարկեն: Այսինքն, քրեական հարթության հետ բացարձակ աղերս չկա:
Իմ կարծիքով, ՀՔԾ-ն չուներ այդ իրավասությունը՝ ցուցում տալու պետական լիազոր մարմիններին, որպեսզի նրանք վարչական կամ քաղաքացիական դատավարության կարգով գործառույթներ իրականացնեն: Այդ 20-30 տարածքների հետ կապված քրեական գործ չկա, չի հարուցվել»,-հայտարարեց պաշտպանը:
Ինչ վերաբերում է ՀՔԾ-ի հայտարարությանը, թե այդ անշարժ գույքերը ձեռք են բերվել կեղծ մրցույթների արդյունքներով, Լեւոն Բաղդասարյանն ասաց. «Եթե կեղծ մրցույթների արդյունքում լիներ, վարույթն իրականացնող մարմինը վաղուց կշտապեր քրեական գործ հարուցել, մի հատ էլ հանրությանը տեղեկացնել, կանխակալ վերաբերմունք հայտնել, որ հանցակազմ կա:
Ես փաստում եմ, որ օրինական ճանապարհով են ձեռք բերվել դրանք, բայց եթե քաղիրավական հարթության վրա լիազոր մարմինը կգտնի, որ գործարքը պետք է անվավեր ճանաչվի, որը պետք է լինի դատական կարգով, մենք պատրաստ կլինենք վիճարկել»:
