Ռուս զինվորականի կողմից Գյումրիում սպանված հայ կնոջ գործը քննության եւ ռազմաբազայի միջեւ փոխգործակցության հարց է։ Այս մասին այսօր՝ դեկտեմբերի 18-ին, մամուլի ասուլիսի ժամանակ հայտարարել է Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը։  

Դիվանագետը շեշտել է, որ իր տվյալներով՝ փոխգործակցությունը բավականին սերտ է. «Այն իրականացվում է հայկական օրենսդրության հիման վրա եւ իրավապայմանագրային այն փաստաթղթերի վրա, որոնցով կարգավորվում է ՀՀ տարածքում բազայի գործունեությունը»։

Կոպիրկինն ընդգծել է, որ այդ հարցը չի կարելի քաղաքականացնել։ Նա հանցագործությունը բնութագրել է որպես սարսափելի՝ եւս մեկ անգամ ցավակցություն հայտնելով սպանված գյումրեցի կնոջ հարազատներին ու մտերիմներին, ապա համոզմունք հայտնել, որ մեղավորը պետք է իր արժանի պատիժը ստանա։

Սակայն Սերգեյ Կոպիրկինը նշել է, որ այս գործը չի կարելի քաղաքականացնել, քանի որ դա ոչ մի կերպ չի նպաստի հետաքննության արդյունավետությանն ու օբյեկտիվությանը. «Եկեք նրանց չխանգարենք»։

Երբ դա տեղի ունեցավ, քննությունը չուներ նախնական վարկած։ Հիշեք շրջանի դատախազության հայտարարությունը, որն ասում էր՝ «ի՞նչ կապ ունի այստեղ 102-րդ ռազմաբազան»։ Բայց հենց այդ օրերին  որոշակի ԶԼՄ–ներում հստակ ուղղորդվածությամբ միանշանակ այն միտքն էր հնչում, թե հետքերը 102-րդ ռազմաբազա են տանում։ Եվ դա արվում էր մինչեւ այն պահը, երբ քննությունը կանգ առավ ինչ–որ վարկածի վրա»,–նշել է դեսպանը։

Հիշեցնենք, որ Հայաստանում կալանավորվել է 102-րս ռազմաբազայի զինծառայողը, որը մեղադրվում է գյումրեցի 57-ամյա Ջուլիետա Ղուկասյանի սպանության մեջ։