Սերգեյ Լավրովի հայտարարությունը բազմաթիվ լրատվամիջոցներ խեղաթյուրված ձեւով էին ներկայացրել: Այս մասին դեկտեմբերի 18-ին լրագրողների հետ հանդիպման ժամանակ հայտարարեց Մարդկային զարգացման միջազգային կենտրոնի ղեկավար Թեւան Պողոսյանը:
Նրա խոսքով՝ ՌԴ արտգործնախարարը խոսել է լաբորատորիաների մասին, սակայն լրատվամիջոցներւմ տեղեկատվությունն այնպես է ներկայացվել, կարծես խոսքը ենթադրյալ ռազմական բազայի մասին է:
«Խոսքը լաբորատորիաների մասին էր, իսկ լրատվամիջոցներում հրապարակումները այնպիսի տպավորություն էին ստեղծում, որ խոսքն օտարերկրյա զորքերի մասին է եւ ռուսկան կողմն անհանգստացած է Հայաստանում դրանց տեղակայման հեռանկարով: Մենք պետք է սովորենք տեղեկատվության սեփական աղբյուրներով առաջնորդվենք եւ դա բոլոր հացերին է վերաբերում», - ասաց Պողոսյանը:
Նա ընդգծեց, որ հայ հասարակությունը շատ հեշտ է ապատեղկատվությունն ընդունում:
«Շատ բան է խոսվում ղարաբաղյան հարցի փոփոխությունների մասին, Ալիեւի հռետորաբանությունը մեղմացել է, սահմանապահների տեղակայման մասին խոսակցություններ են գնում: Սակայն պետք է հաշվի առնել, որ այդ տեղեկատվությունը դրսից է գալիս: Մենք պետք է մեր տվյալներով առաջնորդվենք: Օրինակ՝ պետք է հաշվի առնել այն, թե ինչպես է փոխվել Ադրբեջանի ռազմական բյուջեն, ինչ բանակցություններ են ընթանում այս կամ այն տեսակի զենքի գնման համար, շարունակվող զանգվածային զորավարժությունները, արդյոք նրանք ընդհանրապես հրաժարվել են ռազմական հռետորաբանությունից», - ասաց նա:
Թեւան Պողոսյանը կարծում է, որ հնարավոր է օգտագործել Նիկոլ Փաշինյանի առաջարկած բանաձեւը, ըստ որի, անհրաժեշտ է պարզել, թե ինչ զիջումների է պատրաստ Բաքուն, ապա խոսել այն մասին, թե ինչ զիջումների ենք պատրաստ մենք:
Հիշեցնենք, որ Ռուսաստանի արտաքին գործերի նախարար Սերգեյ Լավրովը «Կոմսոմոլսկայա պրավդա» ռադիոկայանի եթերում հայտարարել էր, որ Մոսկվան եւ Երեւանը ավարտում են փաստաթղթի պատրաստումը, որը երաշխավորում է Հայաստանի տարածքում օտարերկրյա ռազմական բիոլաբորատորիաների բացակայությունը: