«Նիկոլ Փեաշինյանը դավաճան է»,- դեկտեմբերի 18-ին լրագրողների հետ հանդիպման ժամանակ ասաց «Երկիր ծիրանի» կուսակցության ղեկավար Զարուհի Փոստանջյանը:
Ընդդիմադրի խոսքով՝ եթե Փաշինյանը նախկինում հանդես էր գալիս Սերժ Սարգսյանի ռեժիմի տապալմամբ՝ նրան դավաճան անվանելով, ապա հիմա ինքն է Լեռնային Ղարաբաղի հարցում դավաճանական քաղաքականություն վարում: «Այսպես կոչված, հեղափոխական շարժումն իրականություն դարձավ հողերը հանձնելու ճանապարհով ղարաբաղյան հիմնահարցի լուծման եւ 7 մլրդ արտաքին պարտքով տնտեսական ծանրագույն վիճակի ֆոնին: Սա բերեց իշխանափոխության անհրաժեշտության՝ դավաճանական գծի շարունակման նպատակով»,- նշեց նա:
Փոստանջյանը շեշտեց, որ անհրաժեշտ է հրաժարվել այն սկզբունքներից, որոնք դրվել են նախկին իշխանությունների բանակցությունների արդյունքներով: «Այսօր Նիկոլ Փաշինյանն ասում է, որ Ղարաբաղի անունից բանակցություններ չի վարի: Սակայն Դուշանբեում վերելակի մեջ ինչ-որ պայմանավորվածությունը վկայում է այն մասին, որ նման բանակցություններ վարվում են»,- նշեց «Երկիր ծիրանիի» ղեկավարը:
Նրա խոսքով՝ իրեն մտահոգում է այն փաստը, որ Նիկոլ Փաշինյանը ոչ մի ձեւով չի արձագանքում ռազմական տեխնիկայի կուտակմանը, ինչպես նաեւ զորքերի առաջխաղացմանը Տավուշի մարզի եւ Նախիջեւանի ուղղություններում կամ էլ՝ անհամարժեք է արձագանքում:
