Անհրաժեշտ է դադարեցնել Ղարաբաղի շուրջ իրավիճակի վերաբերյալ անհիմն հայտարարությունները: Դեկտեմբերի 18-ին լրագրողների հետ հանդիպման ժամանակ այս մասին ասաց «Ազգային անվտանգություն» կուսակցության ղեկավար Գառնիկ Իսագուլյանը:
Նրա խոսքով՝ վերջին շրջանում շատ բաներ են ասվում, որոնք իրականությանը չեն համապատասխանում: «Ղարաբաղում իրավիճակը շարունակում է հանգիստ մնալ: Սա վերաբերում է թե՛սահմանային իրավիճակին, թե՛ քաղաքական իրադրությանը: Նրանց, ովքեր իրականությանը չհամապատասխանող հայտարարություններ են անում, խորհուրդ եմ տալիս Ղարաբաղ այցելել եւ ամեն ինչ սեփական աչքերով տեսնել: Շարունակվում են ճանապարհաշինական ծրագրերը, որոնք ավելի վաղ էին նախաձեռնվել, այլ սոցիալ-տնտեսական ծրագրերի իրականացումը: Նման պայմաններում աննպատակահարմար եւ անպատասխանատու է խոսել որեւիցե հող հանձնելու մասին»,- նշեց նա:
Անդրադառնալով Ղարաբաղի Պաշտպանության բանակի ղեկավարության կադրային վերադասավորումներին, ինչպես նաեւ դրանց հնարավոր քաղաքական ենթատեքստին՝ Գառնիկ Իսագուլյանը շեշտեց, որ այս ամենը պետք է դիտարկել անկախ Ղարաբաղի շրջանակում, որն ինքնուրույն է որոշումներ կայացնում: Բացառված չեն առանձին հարցերով բանակցությունները, սակայն վերջին խոսքը պատկանում է Ղարաբաղի ժողովրդին եւ իշխանություններին:
«Ղարաբաղի Պաշտպանության բանակի ղեկավարությունում վերադասավորումները պետք է գնահատել որպես հերթական, նույնպիսին, ինչպիսին եղել է նաեւ նախկինում: Նման որոշում ընդունելու ոչ մի քաղաքական պատճառաբանության մասին խոսելու հարկ չկա: Լեւոն Մնացականյանը կարեւոր նախարարություն էր ղեկավարում եւ իր փորձով մեծ լումա կունենա Ղարաբաղի ԱԻՆ-ի կայացման գործում»,- հավելեց «Ազգային անվտանգություն» կուսակցության ղեկավարը:
