Նոր գլխավոր քարտուղարի նշանակումից հետո ՀԱՊԿ արդյունավետությունը պետք է ավելանա: Այս մասին դեկտեմբերի 18-ին Երեւանում ասուլիսի ժամանակ հայտարարեց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը:
Նրա խոսքով, այս հարցում Ռուսաստանի դիրքորոշումը հիմնված է կազմակերպության ամրապնդման հիմնարար շահագրգռվածության վրա, ինչպես նաեւ անդամ երկրների միջեւ համաձայնության ամրապնդման վրա: «Սակայն միանգամից հիշեցնեմ, որ ՀԱՊԿ-ում ես չեմ ներկայացնում Ռուսաստանը», - նշեց Կոպիրկինը:
Դեսպանն ընդգծեց, որ Ռուսաստանը շահագրգռված է, որ այս հարցը լուծվի առանց կազմակերպության արդյունավետությանը վնաս պատճառելու:
«Ընդհակառակը՝ այն պետք է ամրապնդվի, այդ թվում իրավական հարցերի կատարելագործման, այս կամ այն հարցերի վերաբերյալ անճշտությունների հստակեցման շնորհիվ: Ինչ վերաբերում է գլխավոր քարտուղարին, ապա այդ հարցը լուծվում է պետությունների ղեկավարների մակարդակով», - ասաց ռուս դիվանագետը:
Հիշեցնենք, որ ՀԱՊԿ գլխավոր քարտուղարի պաշտոնը, Հայաստանի ներկայացուցչի, գեներալ-գնդապետ Յուրի Խաչատուրովի հետկանչից հետո, թափուր է մնացել: Հայաստանում նրա դեմ քրեական գործ է հարուցվել: Նախկին գլխավոր քարտուղարը մեղադրվում է 2008 թվականի մարտի 1-ին սահմանադրական կարգը տապալելու մեջ: