Ադրբեջանի ԱԳ նախարար Էլմար Մամեդյարովը հայտարարել է Հայաստանի ԱԳ նախարար Զոհրաբ Մնացականյանի հետ ղարաբաղյան կարգավորման բանակցություններում փոխըմբռնման հասնելու մասին՝ տեղեկացնում է Ինտերֆաքս-Ադրբեջանը։
«Կարծում եմ, որ Միլանում իմ հայ գործընկերոջ հետ վերջին հանդիպման ժամանակ մենք երկար տարիների ընթացքում առաջին անգամ հասանք փոխըմբռնման»,- երեքշաբթի դիվանագիտական կորպուսի ղեկավարների համար ընդունելության ժամանակ ասել է Մամեդյարովը։
Նա նշել է, որ ղարաբաղյան հակամարտության կարգավորման ուղիների որոնումը Ադրբեջանի համար կմնա գլխավոր խնդիրը 2019 թվականին։ «Ժամանակի մեծ մասը ես նվիրել եմ ղարաբաղյան հակամարտության լուծման ուղիների որոնմանը։ Դա կարեւոր խնդիր կլինի նաեւ հաջորդ տարում»,- ընդգծել է նախարարը եւ հավելել․ «Գլխավոր նպատակը շոշափելի արդյունքների հասնելն է»։
Նրա խոսքերով՝ 2019թ․ հունվարին Մնացականյանի հետ կայանալիք հանդիպմանը նույնպես կքննարկվեն հակամարտության խաղաղ կարգավորման ուղիները։ «Մենք կքննարկենք հակամարտության լուծման ուղիները։ Ադրբեջանը հակամարտության խաղաղ կարգավորման կողմնակից է»,- ասել է Մամեդյարովը։
