Դեկտեմբերի 17-ին Լոս Անջելեսում ՀՀ գլխավոր հյուպատոս Արմեն Բայբուրդյանը հանդիպում ունեցավ Կալիֆորնիայի նահանգային սենատորներ Էնթոնի Պորտանտինոյի (Anthony Portantino), Հենրի Սթերնի (Henry Stern), Գլենդեյլի քաղաքապետ Զարեհ Սինանյանի եւ Գլենդեյլի քաղաքային խորհրդի քարտուղար Արտաշես Քասախյանի հետ՝ սենատոր Պորտանտինոյի գրասենյակում:
ԱԳՆ-ից NEWS.am-ին հայտնում են, որ գլխավոր հյուպատոս Բայբուրդյանը ներկայացրեց Հայաստանի խորհրդարանական արտահերթ ընտրության արդյունքները եւ երկրի քաղաքական ու տնտեսական զարգացման հեռանկարները:
Հանդիպման ընթացքում քննարկվեցին Հայաստանի եւ Կալիֆորնիայի միջեւ տնտեսական, առեւտրային, կրթամշակութային կապերի խթանմանը միտված գործնական ծրագրեր եւ երկկողմ կապերին համակարգված բնույթ հաղորդելու քայլերը:
Պայմանավորվածություն ձեռք բերվեց պարբերական հանդիպումներով հետամուտ լինել Հայաստան-Կալիֆորնիա գործակցության օրակարգի իրագործմանը եւ Կալիֆորնիայի սենատի շրջանակներում երկկողմ համագործակցության նշյալ հարցերի արծարծմանը:
