Հայաստանը 149 երկրների շարքում գենդերային հավասարության մակարդակով 98-րդ տեղն է զբաղեցրել: Համաշխարհային տնտեսական ֆորումը հրապարակել է իր ամենամյա գենդերային հավասարության վարկանիշը, որում աշխարհի տարբեր երկրներում տղամարդկանց եւ կանանց հավասարությունը գնահատվել է մի շարք սոցիալական, քաղաքական եւ տնտեսական չափանիշներով:
Վարկանիշում հաշվի է առնվում տղամարդկանց եւ կանանց մասնակցությունը տնտեսության, քաղաքականության մեջ, նրանց դիրքը աշխատանքի շուկայում, հասանելիությունը կրթությանը եւ առողջության մակարդակը:
Ինչ վերաբերում է հարեւան երկրներին, ապա Վրաստանը 99-րդ տեղում է, Ադրբեջանը՝ 67-րդ, Թուրքիան՝ 130-րդ, իսկ Իրանը՝ 142-րդ: Ռուսաստանը վարկանիշում զբաղեցնում է 75-րդ տեղը:
Զեկույցի համաձայն՝ աշխարհում տղամարդկանց եւ կանանց միջեւ հավասարություն կարող է լինել 108 տարի հետո:
