Բաքվի վերջին աննախադեպ գործողությունները հետագայում կօգտագործվեն բանակցություններում: Այս մասին դեկտեմբերի 19-ին լրագրողների հետ հանդիպման ժամանակ հայտարարեց քաղաքագետ Ռուբեն Մեհրաբյանը:
Նրա խոսքով, այսօր կարելի է երեք հիմնական փոփոխություններ արձանագրել, որոնք, մի կողմից, Բաքվի համար ձեռնտու են ներկայիս պայմաններում, մյուս կողմից՝ կօգտագործվեն որպես մանրադրամ:
«Բանակցությունները ակտիվ փուլ են մտել: Հայ-ադրբեջանական եւ ղարաբաղա-ադրբեջանական սահմանի աննախադեպ հանգստությունը եւ Հայաստանի եւ Ադրբեջանի ղեկավարների միջեւ ուղիղ կապի հաստատումը, ինչպես նաեւ հայ-ադրբեջանական սահմանին սահմանապահ զորքերի տեղափոխումը, բանակցություններում Բաքվի կողմից կօգտագործվի խաղաղ կողմի կերպաի ստեղծման համար: Այդ տարամաբանության մեջ է մտնում նաեւ Ադրբեջանի ԱԳ նախարարի երեկվա հայտարարությունը Մնացականյանի հետ ձեռք բերված պայմանավորվածության մասին», - ասաց նա:
Մեհրաբյանը շեշտեց, որ Հայաստանի իշխանությունների արձագանքն այս հարցում համարժեք է, քանի որ անվտանգության իրական երաշխիքներ դեռ չկան, չի կարելի խոսել էական փոփոխությունների մասին: «Պետք է հասկանալ, որ Ղարաբաղի անկախությունից բացի այլընտրանքային տարբերակները կհանգեցնեն տեղական բնակչության ցեղասպանությանը: Դրա համար, քանի դեռ կարգավիճակի հարցը լուծված չէ, որեւէ տարածքային հարց չի կարող արդիական լինել: Մենք պետք է հասկանանք, թե ինչ կստանանք փոխզիջումների փոխարեն», - ավելացրեց փորձագետը:
Նա համոզված է, որ Ղարաբաղի խնդիրը չի կարող լուծվել առանց Ստեփանակերտի մասնակցության: «Նիկոլ Փաշինյանի ` Ղարաբաղը բանակցային գործընթացում ներգրավելու ցանկությունը լիովին հիմնավորված է: Չգիտես ինչու ոչ ոք չի խոսում բանակցությունների եռակողմ ձեւաչափը (Հայաստան, Ադրբեջան եւ ԼՂՀ - խմբ.) երկկողմով փոխելու մասին, որը տեղի ունեցավ Քոչարյանի նախագահության ընթացքում: Ղարաբաղյան խնդրի լուծումը անհնար է առանց Ղարաբաղի ժողովրդի մասնակցության», - ասաց Ռուբեն Մեհրաբյանը: