Ճապոնիայում վաճառքում հայտնվել է ռոբոտ, որը կարող է գնորդների համար ընտանի կենդանուն փոխարինել: Այն ստեղծվել է Groove X վենչուրային ընկերության կողմից եւ ստացել Lovot անունը (Love եւ «ռոբոտ» բառերի համակցությունից), հաղորդում է ՏԱՍՍ-ը:
Սարքը լավ հիշում է իր տերերին եւ հատուկ ստեղծված է նրա համար, որ նրան ձեռքերին վերցնեն:
Ռոբոտը տաք եւ հաճելի մակերեւույթ ունի, իսկ նրա հասակը մարդու ծնկից բարձր չէ: Օրորելու դեպքում Lovot-ը կարող է քնել, ինչպես նաեւ տարբեր հնարքներ անել, քանի որ ինքնուսուցման համար հզոր համակարգիչ եւ արհեստական ինտելեկտի համակարգեր ունի:
Ռոբոտը տեսախցիկ ունի, որը թույլ է տալիս այն որպես անվտանգության համակարգ եւ տանը մնացած երեխաներին հետեւելու համար օգտագործել: Նա ֆիքսում է շրջապատի մարդկանց վարքը եւ դրանից ելնելով՝ որոշում իր վերաբերմունքը նրանց նկատմամբ: Օրինակ՝ Lovot-ը կխուսափի մարդուց, որը նրան հարվածել կամ նեղացրել է:
Ռոբոտը վաճառվում է զույգով՝ 600 հազար իենից մի փոքր ցածր գնով (մոտ 5 հազար դոլար):