0038 հրամանի կոնտեքստում Հայաստանի Զինված ուժերի մի շատ մեծ հատված ներգրավված է եղել այդ պրոցեսներին. հիմա ի՞նչ ենք առաջարկում, Զինված ուժերի այդ հատվածը կտրել անջատե՞լ ՀՀ զինված ուժերից: Այս մասին, այսօր՝ դեկտեմբերի 19-ին, Դիլիջանում, լրագրողների հետ զրույցում նշեց ՀՀ վարչապետի պաշտոնակատար Նիկոլ Փաշինյանը՝ անդրադառնալով Հայաստանի ԶՈւ գլխավոր շտաբի հետախուզության վարչության նախկին պետ, գեներալ-մայոր Արշակ Կարապետյանի վարչապետի խորհրդական նշանակվելու հետ կապված դժգոհությանը։ Նշվում է, որ Արշակ Կարապետյանին մեղադրում էն ապրիլյան պատերազմի ժամանակ լուրջ թերացումների համար, նաեւ նա 0038 գաղտնի հրամանով եղել է կայազորի ղեկավար:
«0038 հրամանի հետ կապված քննություն է ընթանում, որը վերաբերում է բոլոր այն մարդկանց, որոնց գործողություններում առերեւույթ ի հայտ են գալիս հանցագործության հատկանիշներ ու կապ չունի, թե այդ մարդը ով է: Մենք խոսում ենք մարտի 1-ին զինված ուժերի ներգրավվածության մասին: Զինված ուժերի այդ ներգրավված ներկայացուցիչների 90 տոկոսն այսօր էլ շարունակում են ծառայել:
Եթե որեւէ հայտարարություն բանավոր հնչում է որեւէ մեկի հասցեին, դա չի նշանակում, որ կայացվել է դատավճիռ:
Նրանք, որոնք ասում են, որ քառօրյա պատերազմի պատասխանատուն Արշակ Կարապետյանն է, նրանք, ըստ էության, ասում են, որ նրանից վերեւ ոչ մեկը պատասխանատու չէ: Նրանք, որոնք հիշատակում են, որ Արշակ Կարապետյանին Սերժ Սարգսյանն աշխատանքից հանել է այդ իրադարձությունների արդյունքում, նրանք ասում են, որ Սերժ Սարգսյանն արդար դատավոր է եւ արդար որոշում է կայացրել:
Ես քառօրյա պատերազմի մասին կարդացել եմ տասնյակ, եթե ոչ հարյուրավոր էջերով գաղտնի նյութեր եւ այդ նյութերում ոչինչ չեմ գտել հետախուզական տվյալների բացակայության կամ պակասի մասին: Մենք ունենք շատ հարցեր ապրիլյան պատերազմի մասին եւ մենք պետք է շատ հանգիստ, հանդարտ պետք է գտնենք այդ հարցերի պատասխանները եւ թույալտրելի մասը ներկայացնենք հանրությանը»,-հայտարարեց Փաշինյանը:
Նա ընդգծեց, որ ոչ ոք չի առաջարկել Արշակ Կարապետյանի թեկնածությունը. «Ես եմ նշանակել եւ եթե որեւէ փուլում հարցեր կծագեն նրա հետ կապված, նա այս կարգավիճակում ավելի մեծ պարտավորություն կունենա հարցերին պատասխանել կոնկրետ եւ սպառիչ»:
Ինչ վերաբերում է տեսանյութին, որտեղ դեռ ապրիլին Փաշինյանի թիմակիցները դժգոհում են, որ Արաշ Կարապետյանի նման մարդուն նշանակել են ռազմական կցորդ, Փաշինյանն արձագանքեց. «Խարույկի ուրջ նստած խոսել ենք, այո ես էլ եմ այնտեղ եղել: Նախկինում հնչած հայտարարությունները, անգամ իմ ու իմ թիմակիցների կողմից, որեւէ մեկի նկատմամբ դատավճիռ չէ: Քառօրյա պատերազմի մեկնարկից առաջ առնվազն մեկ ամիս, եթե ոչ ավելի, ադրբեջանական զորքերի կուտակում է եղել ամբողջ շփման գծի երկայնքով, որը իմացել են բոլորը: Ես հիմա իրավունք չեմ վերապահի գնահատականներ տալ տեղի ունեցածի վերաբերյալ»: