Նախընտրական արշավին մասնակցող քաղաքական ուժերի առաջնորդների հեռուստաբանավեճի անցկացումը Հայաստանի նորագույն պատմության մեջ աննախադեպ երեւույթ էր: Այս մասին դեկտեմբերի 20-ին մամուլի ասուլիսի ժամանակ ասաց «Հանուն սոցիալական արդարության» կուսակցության անդամ, քաղաքագետ Գրիգորի Բալասանյանը:
Նրա խոսքով՝ Հայաստանում առաջին անգամ ընտրություններն անցան առանց միջադեպերի, առանց քվեաթերթիկների լցոնումների, առանց ծեծկռտուքների: Սակայն դրական առաջընթացի ֆոնին, Բալասայանի կարծիքով, եղան նաեւ բացասական գործոններ: «Նախընտրական շրջանում, ըստ էության, պայքարող քաղաքական ուժերի միջեւ բանավեճեր չեղան, եւ ընտրողն ընտրեց ոչ թե քաղաքական եւ գաղափարախոսական ծրագրերը, այլ կուսակցություններին եւ անհատներին: Սա անհատների ընտրություն էր, այլ ոչ թե գաղափարախոսությունների»,- նշեց նա:
Բալասանյանը նշեց, որ նախընտրական շրջանում «Իմ քայլը» դաշինքը այդպես էլ չներկայացրեց իր ծրագրի տնտեսական մասը, ինչը չի կարող մտահոգություն չառաջացնել. «Մտահոգություն է հարուցում նաեւ վարչապետի պաշտոնակատարի նախընտրական հռետորաբանությունը, որն անընդհատ հայտարարում էր, որ անհրաժեշտության դեպքում մարդկանց պատին կծեփի եւ ասֆալտին կպառկեցնի: Ըստ էության, «Իմ քայլը» դաշինքի թիրախն ուղղված էր մեկ քաղաքական ուժի դեմ, որ նախկին իշխող կուսակցությունը ձայներ չստանա: Այս ամենը պատիվ չի բերում ոչ մի քաղաքական գործչի եւ ոչ մի քաղաքական ուժի»:
Նա հույս հայտնեց, որ ապագայում արդեն իշխող քաղաքական ուժը կհրաժարվի նման ագրեսիվ հռետորաբանությունից:
Բալասանյանը բացասական ենթատեքստում նշեց, որ նախընտրական արշավի ընթացքում քաղաքական ուժերը քարոզչության համար շատ մեծ գումարներ են ծախսել. «Այս իմաստով սրանք աննախադեպ ընտրություններ էին»: