Կաթոլիկ եկեղեցին «այլևս երբեք» չի քողարկի սեռական բռնությունը հոգևորականության ներկայացուցիչների կողմից։ Այս մասին հայտարարել է Հռոմի պապ Ֆրանցիսկոսը՝ պահանջելով, որպեսզի մանկապղծությամբ և բռնաբարությամբ զբաղված հոգևորականները հանձնվեն արդարադատությանը, տեղեկացնում է «Ասոշիեյթիդ պրեսը»։
Հովվապետը խոստովանել է, որ նախկինում եկեղեցին խնդրին լրջորեն չի վերաբերվել՝ դրանում մեղադրելով նրա առաջնորդներին, որոնք անփորձության կամ կարճատեսության պատճառով «անպատասխանատու» են եղել՝ հրաժարվելով հավատալ զոհերին։ Բայց նա երդվել է, որ այսուհետ եկեղեցին չի քողարկի նման դեպքերը։ «Եկեղեցին ջանք չի խնայի, որպեսզի հնարավոր ամեն բան անի պատասխանատվության կանչելու համար նրանց, ովքեր նման հանցագործություններ են կատարել»,– ասել է նա։
2018 թվականը կաթոլիկ եկեղեցու համար նշանավորվեց ահավոր սկանդալներով՝ կապված հոգևորականների կողմից երեխաների հանդեպ սեռական բռնության բազմաթիվ դեպքերի հետ։