1976թ․ մեքսիկական Չյապաս նահանգի բնակիչը անտառում հսկայական կորալյան Micrurus nigrocinctus օձ էր գտել եւ փոխանցել էր գիտնականներին։ Վերջինները սողունի որովայնում օտար կիսամարսված մարմին էին հայտնաբերել, սակայն դա նրանց անսովոր չէր թվացել, եւ այն չորս տասնամյակ փոշոտվում էր արխիվներում։ Միայն բոլորովին վերջերս է դրանով որոշել զբաղվել Տեխասի համալսարանից մասնագետների խումբը, ինչի շնորհիվ օձի նոր տեսակ է հայտնաբերվել՝ տեղեկացնում է Nat-geo-ն։
Կորալյան օձի համար որպես ճաշ է ծառայել ուրիշ՝ գիտնականներին բոլորովին անհայտ տեսակի սողուն՝ 26 սանտիմետրանոց մեծահասակ արու։ Տեսակի որոշման հարցում կարեւոր նշանակություն ունի թեփուկների ծածկույթը, եւ գիտնականներն ուշադրություն են դարձրել այն բանի վրա, որ նոր տեսակի օձի պոչի տակի թեփուկները զույգավորված չեն եղել։ Գիտությանը հայտնի տեսակներից տարբերվել է նաեւ գանգի ձեւը։
Նոր տեսակը ստացել է Cenaspis aenigma («հանելուկային ճաշային օձ») անվանումը։ Այն պատկանում է փորողների դասին։ Այդ մասին են վկայում գանգի երկարավուն ձեւը, եւ այն, որ մարդիկ երբեք նրան չեն տեսել, քանի որ այդպիսի օձերը ստորգետնյա կյանք են վարում։
Քանի որ գտածոյի ողջ տեսակը չունեն, գիտնականները ոչինչ ավելին չեն կարող ասել այս օձի մասին։ Անհասկանալի է օձի զարգացած ծնոտը։ Փորող սողունները սովորաբար սնվում են անողնաշարավորներով, սակայն Cenaspis aenigma-ն լավ զարգացած ատամներ ունի, ինչը վկայում է այն մասին, որ նա նաեւ «կոշտ» կենդանիներ է կերել։