«Երկիր Ծիրանի» կուսակցության նախագահ Զարուհի Փոստանջյանն իրավունք է ստացել զբաղվելու փաստաբանական գործունեությամբ։ Այս մասին այսօր՝ դեկտեմբերի 26–ին Երեւանի ընդհանուր իրավասության դատարանում «Սասնա ծռեր» խմբի 10 անդամների գործով հերթական դատական նիստից հետո լրագրողների հետ զրույցում հայտարարեց նա։
Փոստանջյանն ասաց, որ ցանկանում է պաշտպանել ՊՊԾ գնդի գրավման գործով ամբաստանյալներին։
«Դուք գիտեք դահլիճում գտնվող անձանց վերաբերյալ իմ կարծիքն ու դիրքորոշումը եւ մեր մտերիմ հարաբերությունները։ Ես ցանկանում եմ, որպեսզի իրենց իրավունքները պաշտպանեմ»,–ասաց նա։
NEWS.am–ի հարցին, արդյոք պաշտպանությունը ստանձնելու համար ամբաստանյալները դիմել են իրեն, Փոստանջյանը պատասխանեց.
«Ամեն ինչի մասին շուտով կիմանաք»։
Նա չբացառեց, որ կպաշտպանի այս գործով կալանքի տակ գտնվող երկու ամբաստանյալներին՝ Արմեն Բիլյանին եւ Սմբատ Բարսեղյանին։
Փոստանջյանի խոսքով՝ ոստիկանների սպանության մեջ մեղադրվող Արմեն Բիլյանը եւ Սմբատ Բարսեղյանը պետք է ազատ արձակվեն։
«Կարիք չկա նրանց պահելու կալանքի տակ։ Անձի նկատմամբ նախնական կալանքը, որպես խափանման միջոց պետք է լինի բացառիկ միջոց»,–ասաց նա՝ նշելով, որ ՊՊԾ գնդի գրավման գործով ամբաստանյալների նկատմամբ առաջադված մեղադրանքն օրինական չէ եւ որ նրանք այս ընթացքում չպետք է գտնվեին կալանքի տակ։
Նախկին պատգամավորի խոսքով՝ թեեւ ՊՊԾ գնդի գրավման գործով ամբաստանյալներից շատերի փախանման միջոցները փոխված են, սակայն նրանք գտնվում են քաղաքական հետապնդման մեջ։ Նա նշեց, որ իր նպատակը նրանց արդարացմանը հասնելն է։
Հիշեցնենք, որ «Սասնա ծռեր» խմբի 10 անդամների գործով ներկայումս կալանքի տակ են ամբաստանյալներից Արմեն Բիլյանն ու Սմբատ Բարսեղյանը։ 7 ամբաստանյալների նկատմամբ ընտրված խափանման միջոց կալանավորումը փոխվել է՝ պատգամավորների անձնական երաշխավորությամբ, իսկ Պավել Մանուկյանն ազատ է արձակվել 1 մլն դրամ գրավի դիմաց։
