Դուշանբեի պայմանավորվածություններից հետո որպես կարեւոր արդյունք նշվում էր առաջնագծում լարվածության թուլացումը։ Սա փաստացի կարճ տեւեց․ Արցախի պաշտանության նախարարությունը հայտարարել է՝  հակառակորդը շարունակում է առաջնագծի տարբեր հատվածներում ինտենսիվորեն խախտել հրադադարի ռեժիմը, ինչպես նաև որոշ ուղղություններում իրականացնել ռազմավարամարտավարական նշանակության սադրիչ գործողություններ: ՊԲ առաջապահ ստորաբաժանումները առայժմ ձեռնպահ են մնում դիմելու պատասխան քայլերի, սակայն պատրաստակամ են  նման վարքագծի շարունակման դեպքում ձեռնարկել համարժեք գործողություններ: 

Շենգավիթի դատարանը, այսօր, շարունակել է «Սասնա ծռեր» խմբի 10 անդամների գործի քննությունը։ Մեղադրյալ Էդգար Սողոմոնյանի ցուցմունք էր տվել, թե Արմեն Բիլյանին տեսել է զենքը ձեռքին, փողը դեպի սենյակն ուղղված, լսել է կրակոցի ձայն, որից հետո սենյակից դուրս է եկել վիրավոր ոստիկան։ Այս ցուցմունքը, ըստ Բիլյանի, կեղծ է ու թելադրված։

Հիշեցնենք՝ Էդգար Սողոմոնյանը «Սասնա ծռերի» այն անդամն է, որի ծնողները ՊՊԾ գնդի գրավման օրերին մտել էին գնդի  տարածք  և համոզում էին որդուն տուն վերադառնալ։ 

«Սասնա ծռերի» դատին մասնակցում էր նաեւ Զարուհի Փոստանջյանը։ Նա կպաշտպանի Արմեն Բիլյանի եւ Պավել Մանուկյանի շահերը ։ Մինչ այս Փոստանջյանը լրագրողներին ասել էր, որ մեղադրանքը օրինական չէ եւ իր նպատակն է հասնել «Սասնա ծռերի» արդարացմանը։ Հարցին, թե հնարավո՞ր է Հայաստանում նոր ապստամբություն ծագի, Փոստանջյանը պատասխանել է՝ իհարկե Նա զարգացրեց թեման, հայտարարեց՝ տեղի է ունեցել կեղծիք, որ իբրև թե Սերժ Սարգսյանը մերժվել է, եւ նրա տեղը եկել է մի նոր անձնավորություն, մինչդեռ ամբողջ քաղաքական կառուցվածքը շարունակում է մնալ նույնը։ 

Վահագն Հարությունյանին առաջադրված մեղադրանքը լրացվել է։ Նա Մարտի 1-ի գործով քննչական խմբի նախկին ղեկավարն է, մեղադրվում է նույն գործով ապացույցներ կեղծելը կազմակերպելու համար, սրան գումարվել է եւս երկու հոդված՝  պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ  և այդ լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով: Քննիչը կրկին միջնորդություն է ներկայացրել դատարան՝ նրան կալանավորելու համար։  Առաջին մեղադրանքով կալանքի որոշում կար, որը բեկանել էր Վերաքննիչ դատարանը․ այս որոշման դեմ դատախազությունը վճռաբեկ բողոք չի ներկայացնելու: 

Դոլարի փոխարժեքը նվազել է՝ կազմելով 483 դրամ, եվրոն 550 դրամ է, բրիտանական ֆունտը՝ 613, ռուսական ռուբլու փոխարժեքը 6 ու 98 դրամ դրամ է: 

Դեկտեմբերի 27-ին Շիրակում, Լոռիում, Արագածոտնի եւ Կոտայքի լեռնային գոտիներում սպասվում են առատ ձյուն, բուք, ճանապարհներին` մերկասառույց: Երեւանում սպասվում են տեղումներ: Առաջիկա գիշերը մայրաքաղաքում կլինի +1+3, իսկ վաղը ցերեկը՝ +5+7 տաքություն։