Հայաստանի կառավարությունն իր այսօրվա՝ դեկտեմբերի 27-ի նիստում որոշում կայացրեց փետրվարի 17-ին համայնքի ղեկավարի ընտրություններ կազմակերպել Գեղարքունիքի մարզի Վարդենիս քաղաքում, Լոռու մարզի Ձորագետ համայնքում եւ Արմավիրի մարզի Վարդանաշենի համայնքում:
Նշենք, որ Գեղարքունիքի մարզի Վարդենիս համայնքի ղեկավար Արամ Հարությունյանը համայնքի ղեկավարի պաշտոնում ընտրվել էր 2017 թվականի նոյեմբերի 5-ին կայացած համայնքի ղեկավարի ընտրության արդյունքում, սակայն այս տարվա դեկտեմբերի 2-ին հրաժարականի դիմում էր ներկայացրել:
Լոռու մարզի Ձորագետ համայնքի ղեկավար Լյովա Գրիգորյանը համայնքի ղեկավարի պաշտոնում ընտրվել էր 2016 թվականի հոկտեմբերի 2-ին կայացած համայնքի ղեկավարի ընտրության արդյունքում: Նա 2018 թվականի նոյեմբերի 13-ին մահացել էր:
Իսկ Արմավիրի մարզի Վարդանաշեն համայնքի ղեկավար Արթուր Մանուկյանը համայնքի ղեկավարի պաշտոնում ընտրվել էր 2017 թվականի փետրվարի 12-ին կայացած համայնքի ղեկավարի ընտրության արդյունքում: Նա 2018 թվականի նոյեմբերի 19-ին հրաժարականի դիմում է ներկայացրել:
