Ռուսաստանի նախագահ Վլադիմիր Պուտինի Ամանորի և Սուրբ Ծննդի կապակցությամբ շնորհավորանքները՝ ուղղված Հայաստանի երկրորդ նախագահ Ռոբերտ Քոչարյանին, կապված են Հայաստանում ներքաղաքական իրադարձությունների հետ: Այս մասին NEWS.am -ի թղթակցի հետ զրույցում հայտարարել է քաղաքագետ Կարեն Քոչարյանը:

Սակայն, ըստ փորձագետի, այստեղ տարօրինակ բան չկա, քանի որ արդեն մի քանի ամիս առաջ Վլադիմիր Պուտինը շնորհավորեց Ռոբերտ Քոչարյանին, ճիշտ է, ծննդյան օրվա առիթով: «Բայց չէ՞ որ դեռ այն ժամանակ Ռոբերտ Քոչարյանի դեմ արդեն իսկ գործ էր հարուցվել: Այս անգամ կրկին հայկական կողմին Կրեմլի կողմից Ռոբերտ Քոչարյանի առիթով եւս մեկ ազդանշան է ուղարկվել», - պարզաբանել է Քոչարյանը:

Հարցին՝ արդյոք նա գտնում է, որ այդ շնորհավորանքներով Մոսկվան, կարծես թե, ազդանշան է տալիս Երեւանին՝ ասելով, որ պատրաստ է զիջումների գնալ Հայաստանի հետ, ասենք, գազի գնի հարցում՝ Հայաստանի նախկին նախագահին ազատելու դիմաց, քաղտեխնոլոգը պատասխանել է, որ դրանք  բոլորը համալիր խնդիրներ են:

«Այս ամենը կապել միայն գազի գնի եւ Ռոբերտ Քոչարյանի գործի հետ, կարծում եմ, անլուրջ կլինի: Այստեղ գործ ունենք նաեւ ՀԱՊԿ–ի, համագործակցութեան գլոբալ հարցերի ու Ռուսաստանի եւ Հայաստանի միջեւ հարաբերությունների հետ: Եվ այս հարցը համալիր հարցերից ընդամենը մեկն է», - գտնում է Կարեն Քոչարյանը:

Հիշեցնենք, որ Ռոբերտ Քոչարյանը դեկտեմբերի 7-ից կալանքի տակ է: Շնորհավորական ուղերձի մասին հաղորդվել է Ռուսաստանի նախագահ Վլադիմիր Պուտինի եւ Հայաստանի վարչապետի պաշտոնակատար Նիկոլ Փաշինյանի միջեւ բանակցությունների ավարտից մի քանի ժամ անց: Վերջինս, Երեւան վերադառնալով, արդեն հասցրել է հայտարարել, որ Հայաստանին մատակարարվող գազի գնի վերաբերյալ համաձայնություն դեռ ձեռք չի բերվել։