Բելգիան երեքշաբթի օրվանից անցել է ՄԱԿ Անվտանգության խորհրդի ոչ մշտական անդամի նոր կարգավիճակով իր մանդատի կատարմանը՝ տեղեկացնում Է ՌԻԱ Նովոստին։

Թագավորության ԱԳՆ-ի կողմից տարածված մամուլի հաղորդագրության մեջ ասվում է, որ առաջիկա երկու տարիների ընթացքում Բելգիան պետք է լինի «խաղախության եւ անվտանգության միջազգային հարցերի պատասխանների որոնման մեջ Անվտանգության խորհրդի եւ մյուս շահագրգրռ կողմերի կառուցողական, հուսալի եւ բաց գործընկերը»։

Բելգիայի, որպես ՄԱԿ ԱԽ ոչ մշտական անդամի կարգախոսն է՝ «Հասնել փոխզիջման, գործել հանուն խաղաղության»։ Երկրի ԱԳ նախարար Դիդյե Ռեյնդերսի խոսքերով՝ բացի Խորհրդի առջեւ կանգնած կոնկրետ խնդիրներից, Բրյուսելը հատուկ ուշադրություն կդարձնի զինված հակամարտությունների կանխմանը, այդպիսի հակամարտություններից տուժած անձանց իրավունքների պաշտպանմանը եւ ՄԱԿ խաղաղարար առաքելությունների արդյունավետ կառավարմանը։

2020թ․ փետրվարին Բելգիան կնախագահի ՄԱԿ ԱԽ-ում, որի ոչ մշտական անդամն է նա եղել 2007-2008թթ․՝ ասվում է մամուլի հաղորդագրությունում։

Նոր ոչ մշտական անդամների թվում են նաեւ Գերմանիան, Դոմինիկյան Հանրապետությունը, Ինդոնեզիան եւ Հարավային Աֆրիկան։ Այս երկրները պետք է աշխատեն ԱԽ հինգ մշտական անդամների՝ Ռուսաստանի, ԱՄՆ-ի, Չինաստանի, Ֆրանսիայի, եւ Մեծ Բրիտանիայի հետ, որոնք վետոյի իրավունք ունեն։

ՄԱԿ ԱԽ-ն մշտական գործող մարմին է, որի վրա, համաձայն ՄԱԿ կանոնադրության 24-րդ հոդվածի, դրված է միջազգային խաղաղության եւ անվտանգության աջակցության գլխավոր պատասխանատվությունը։