Հայաստանն ու Ադրբեջանը 2019 թվականը կսկսեն ԱՄՆ նոր դեսպանների՝ Լին Թրեյսիի եւ Իրլի Լիտցենբերգերի հետ, որոնց թեկնածությունը հաստատվել է Սենատում քվեարկության արդյունքում։
Ամերիկայի Հայ դատի հանձնախմբի փոխանցմամբ, քվեարկությունը տեղի է ունեցել Սենատի արտաքին հարաբերությունների հարցերով հանձնաժողովում Հայոց ցեղասպանության եւ Ադրբեջանի տարածաշրջանային ագրեսիայի հարցերը քննարկելուց հետո:
Այս առնչությամբ, Ամերիկայի Հայ Դատի հանձնաժմբի գործադիր տնօրեն Արամ Համբարյանն ասել է. «Քաղաքական խաղաղ իշխանափոխությամբ եւ ժողովրդավարության զարգացման պայմաններով հատկանշված մեկ տարի հետո, Հայ Դատի հանձնախումբը պատրաստ է համագործակցելու դեսպան Թրէյսիի հետ՝ առավել որակյալ մակարդակի բարձրացնելու հայ-ամերիկյան ռազմավարական հարաբերությունները։ Հայ դատի հանձնախումբն անհամբերությամբ սպասում է նոր տարում դեսպան Թրեյսիի հետ աշխատելուն՝ բարելավելու համար ԱՄՆ-Հայաստան ռազմավարական հարաբերությունները»։
Նա նաեւ հույս է հայտնել, որ «Բաքվում ԱՄՆ դեսպանը մարտահրավեր կնետի Ալիեւի հակահայկական բռնությանը եւ բացեիբաց կհակադարձի ռեժիմի՝ գնալով վատթարացող ճնշումներին ներքին այլախոհության նկատմամբ»:
Նշեն, որ Լին Թրեյսիի թեկնածության հաստատումը հետեւել է սենատորներ Բոբ Մենենդեսի եւ Էդ Մարքիի կողմից Սենատում անցկացված լսումներին, որոնց ժամանակ դեսպանի թեկնածուին հարցեր են ուղղվել Թուրքիայի կողմից Հայոց ցեղասպանության արդար ճանաչմանը խոչընդոտելու հարցում ԱՄՆ քաղաքականության վերաբերյալ:
Սենատորների հարցադրումներին պատասխանելիս Թրեյսին խուսափել է «ցեղասպանություն» բառն օգտագործելուց՝ նշելով, որ «Թրամփի վարչակազմն ու ինքն անձամբ ճանաչում են Օսմանյան կայսրության փլուզման տարիներին տեղի ունեցած զանգվածային սպանություններն ու տեղահանությունները, որոնք 1,5 մլն մարդու կյանք են խլել»:
Ավելի վաղ NEWS.am-ը հայտնել էր, որ Միացյալ Նահանգների Սենատը հունվարի 2-ին հաստատել է Լինն Թրեյսիին Հայաստանում ԱՄՆ դեսպանի պաշտոնում:
«Փորձառու դիվանագետը մինչ Հայաստան գալը Պետքարտուղարության՝ Ռուսաստանի հարցերով ավագ խորհրդականն էր, ավելի վաղ էլ բարձր պաշտոններ է զբաղեցրել Ռուսաստանում, Թուրքմենստանում, Ղազախստանում՝ Միացյալ Նահանգների դիվանագիտական առաքելություններում:
Շաբաթներ առաջ, ելույթ ունենալով Սենատի արտաքին հարաբերությունների հանձնաժողովում, դեսպան Թրեյսին ընդգծված գովեստով էր խոսել Հայաստանում տեղի ունեցած խաղաղ իշխանափոխության մասին, միաժամանակ նկատել, որ Հայաստանը դեռ պետք է մեծ աշխատանք կատարի՝ ձեռքբերումներն ամրագրելու համար:
Սենատը հաստատել է Լինն Թրեյսիին Հայաստանում ԱՄՆ դեսպանի պաշտոնում
