Ամանորյա յուրաքանչյուր սեզոն ավարտվում է ձմեռային տոնի գլխավոր խորհրդանիշի՝ տոնածառի հետ տխուր բաժանմամբ: Եվ եթե «ամանորյա գեղեցկուհին» արհեստական է, ապա այն պահպանվում է հաջորդ Ամանորի համար: Իսկ ահա կենդանի տոնածառերը ամանորյա եւ Ծննդյան տոներից հետո մեծ մասամբ թափված են տեղական աղբավայրերում՝ իրենց տխուր տեսքով փչացնելով տեղի շրջակայքը, փոխանցում է RG-ն:
Հունաստանի իշխանությունները որոշել են վերջ տալ ծառերի նման ոչ ռացիոնալ օգտագործմանը եւ եկող տարում առաջին անգամ գործարկել են «Աղբավայրերում տոնածառեր չկան» ծրագիրը: Աթենքի լրատվական գործակալությունը հայտնել է, որ այս նախաձեռնությունը պատկանում է Հունաստանի շրջակա միջավայրի նախարարությանը եւ մեկնարկել է երկրի մեծությամբ երկրորդ քաղաք Սալոնիկում: Ծրագրի էությունն է տեղական իշխանությունների կողմից քաղաքացիներին պարտադիր իրազեկելը ծառայությունն ավարտած տոնածառերի կենտրոնացված հավաքավայրերի մասին:
Այս կերպ հավաքված ծառերը հունվարի 10-ից փետրվարի վերջը պետք է մանրացվեն պրեֆեկտուրաների կենցաղային թափոնների մշակման կազմակերպությունների եւ մասնավոր ձեռներեցների ուժերով: Այնուհետեւ ստացված սղոցանյութը կմշակվի մասնագիտացված ձեռնարկություններում՝ ստանալով տարբեր երկրորդական արտադրանք:
Հետաքրքիր է, որ այս արշավն ուղղված է ոչ միայն Հունաստանում բնապահպանական իրավիճակի բարելավմանը եւ երկրի անտառֆոնդի վերականգնմանը, այլեւ կոչված է կարիքավորների հասցեական սոցիալական աջակցությանը՝ վերամշակված եւ «երկրորդ կյանք» ստացած ծառերից ստացված շահույթի մի մասը նախատեսվում է բաշխել հենց քաղաքացիների այս խմբերի շարքում: