Չինական Huawei ընկերությունը երկու աշխատակցի պատժել է միջադեպի համար, երբ ընկերության Twitter-յան էջում ամանորյա շնորհավորանքը հրապարակվել է iPhone-ի միջոցով: Այս մասին նշված է ներքին օգտագործման համար նախատեսված փաստաթղթում, որի սքրինշոթը տարածվել է չինական լրատվամիջոցներում եւ համացանցում, փոխանցում է «ՌԻԱ Նովոստի»-ն:
Հունվարի 3-ով թվագրված փաստաթղթում նշվում է, որ միջադեպը, որի ժամանակ Huawei-ի պաշտոնական էջում հայտնվել է «Twitter for iPhone» գրառումը, զգալիորեն անդրադարձել է Huawei ապրանքանիշի վարկանիշի վրա:
Այս ամենի մեղավորը VPN-ի հետ կապված խնդիրներն էին, որը Չինաստանում անհրաժեշտ է Twitter-ի, Google-ի, Facebook-ի եւ մի շարք այլ ծառայությունների ու կայքերի օգտագործման համար: Sapient ծառայությունը, որը աութորսինգի պայմաններում զբաղվում է ընկերության սոցցանցերի մշակմամբ, VPN-ի հետ կապված խնդիրների պատճառով չի կարողացել շնորհավորանքն ուղարկել ստացիոնար համակարգչից, եւ որպեսզի հրապարակումը ժամանակին կատարվի, օգտագործել են sim-քարտով iPhone-ը, որը թույլ է տալիս արգելափակումը շրջանցել:
Ըստ տարածված փաստաթղթի՝ Huawei-ից նաեւ նշել են, որ այս դեպքը վկայում է ղեկավարության անփութության եւ ընթացակարգային նորմերին չհետեւելու մասին: Նման վրիպման համար պատասխանատու աշխատակիցների պաշտոնն իջեցվել է, իսկ նրանց ամսական աշխատավարձը կրճատվել է 5 հազար յուանով (մոտ 730 դոլար):
Ընկերության ղեկավարությունը հույս է հայտնել, որ այս դեպքը եւ ձեռնարկված միջոցառումները մնացյալ աշխատակիցների համար դաս կլինեն:
