Դադիվանքի վանական համալիրի եկեղեցու գմբեթներին վերականգնվել են խաչերը: Այս մասին «Արցախպրեսի» թղթակցի հետ զրույցում ասել է Շահումյանի շրջանի հոգևոր հովիվ Տեր Հովհաննես քահանա Հովհաննիսյանը՝ նշելով, որ նոր խաչերից երկուսի հովանավորությունը ստանձնել է արցախցի Արման Հակոբջանյանը՝ ի հիշատակ հոր, իսկ մյուսը՝ Սուրբ Մարիամ Աստվածածին եկեղեցու բարերար Միքայել Մինասյանը:
«Մինչ տեղադրումը խաչերը օծվել են Արցախի հոգևոր թեմի առաջնորդ Պարգև արքեպիսկոպոս Մարտիրոսյանի ձեռամբ: Ուզում եմ իմ երախտագիտությունը հայտնել մեր բոլոր բարերարներին, նվիրատուներին, որոնք իրենց աջակցությունն են բերում վանական համալիրին: Մեր եկեղեցիները պետք է ունենան օրհնյալ խաչեր: Առանց խաչի եկեղեցին իր զորությունը չունի: Խաչը պահապանն է: Նշեմ նաև, որ Դադիվանքի երեք խաչերի հետ սուրբ ջրով օծվել են ևս մի քանիսը: Դրանք տեղափոխվելու են այլ սրբավայրեր»,- ասել է Տեր Հովհաննես քահանա Հովհաննիսյանը: