Ճապոնիան ծովով կամ օդանավով լքող յուրաքանչյուր զբոսաշրջիկ երկուշաբթիից կհարկվի այս երկրից մեկնելու նոր հարկով, որը կազմում է 1000 իեն (մոտ 10 դոլար), օրենքը գործում է բոլոր երկրների քաղաքացիների համար, փոխանցում է «ՌԻԱ Նովոստի»-ն:
Ճապոնիայի կառավարությունը հաշվարկել է, որ 2020 թվականին Ծագող արեւի երկիր կայցելի միջինը 40 մլն զբոսաշրջիկ, ինչը կարող է պետությանը մեծ եկամուտ բերել, որն, իհարկե, առայժմ անվճար վիզաներ է տրամադրում:
Հարկի վճարումից բացառություններ են կատարվել միայն նավերի եւ օդանավերի անձնակազմերի համար, արտաքսվող անձանց, մինչեւ 2 տարեկան երեխաների եւ տարանցիկ ուղեւորների, դիվանագետների եւ կառավարական հատուկ չվերթների ուղեւորների համար, ինչպես նաեւ եղանակային պայմանների պատճառով Ճապոնիայի օդանավակայաններում այլ երկրների օդանավերի հարկադիր վայրէջքների կամ նավերի ճապոնական նավահանգիստներ մտնելու դեպքերում:
Նրանք, ովքեր մինչեւ հունվարի 7-ը տոմսեր են գնել, այս անգամ Ճապոնիայից մեկնելիս ստիպված չեն լինի հարկ վճարել:
Ճապոնիայի ֆինանսների նախարարության տվյալներրով՝ հարկումից ստացված միջոցները կօգտագործվեն դեմքերն ավտոմատ ճանաչող համակարգերի ներդրման հաշվին Ճապոնիայի միջազգային օդանավակայանների թողունակության բարելավման, տուրիստական տեսարժան վայրերի գրավչության մեծացման, զբոսաշրջիկներին ավելի ամբողջական տեղեկությունների եւ ծառայությունների տրամադրման համար: