Հունաստանում ձյան տեղումներ են սկսվել, երեքշաբթի գիշերը ձյուն է տեղացել Աթենքում, եղանակային վատ պայմանների պատճառով Ատիկայի շրջանների մեծ մասում դպրոցները փակվել են, փոխանցում է «ՌԻԱ Նովոստի»-ն: Հունական դպրոցները հարմարեցված են չեն ցրտին աշխատելու համար: Այն շրջանների ցանկը, որտեղ աշակերտները ստիպված կլինեն տանը մնալ, կհրապարակեն Ատիկայի իշխանությունները եւ քաղաքապետարանները:
Հունաստանում եղանակը վատացել է դեկտեմբերի վերջից, ձյուն է տեղացել երկրի հյուսիսում եւ կենտրոնական մասում, որոշ շրջաններում տեղացել են հորդ անձրեւներ: Վատ եղանակին զոհ է գնացել արդեն 3 մարդ: Ըստ օդերեւութաբանների՝ վատ եղանակը կպահպանվի մինչեւ հունվարի 9-10-ը:
Վերջին օրերին «Տելեմախ» ցիկլոնը հասել է Աթենք: Գիշերը տեղացել է մի քանի սանտիմետր ձյուն: Հունաստանի մայրաքաղաքում ձյունը հաճախ հանդիպող երեւույթ չէ, այն սովորաբար հալչում է մի քանի ժամ հետո:
Ձյան տեղումներն ամեն անգամ մեծ խնդիրներ են ստեղծում: Ոստիկանությունը վարորդներին կոչ է արել ճանապարհներին զգույշ լինել, մի շարք շրջաններում արգելված է երթեւեկել առանց հակասահքային շղթաների: Որոշ մայրուղիներում երթեւեկությունը փակվել է: Արգելված է 3,5 տոննայից ավելի զանգվածով բեռնատարների երթեւեկությունը:
Քաղաքացիական պաշտպանության գլխավոր քարտուղարությունը հայտնել է, որ երկրի պետական համապատասխան մարմիններին, շրջաններին եւ քաղաքապետարաններին իրազեկել է արտակարգ իրավիճակներին պատրաստ լինելու անհրաժեշտության մասին:
Աթենքում բացվել են ջեռուցվող հաստատություններ, որտեղ եղանակի վատ պայմաններից կարող են պատսպարվել անօթեւանները եւ նրանք, ովքեր տան ջեռուցման համար փող չունեն:
