Ղազախստանի ՆԳ նախարարությունում մեկնաբանել են Կարագանդայում սպանության գործով հետախուզվողի ուղերձի հրապարակումը, փոխանցում է Tengrinews.kz-ը՝ վկայակոչելով երկրի ՆԳՆ ներքին եւ արտաքին հաղորդակցության դեպարտամենտի տնօրեն Ալմաս Սադուբաեւին:
Իրավապահների տվյալներով՝ այսօրվա դրությամբ Կարագանդայում խուլիգանական գործողությունների եւ 23-ամյա տղամարդու սպանության կատարման կասկածանքով ձերբակալվել եւ կալանավորվել է 8 մարդ, կասկածյալներից մեկի՝ քաղաքացի Գուրուրյանի նկատմամբ հետախուզում է հայտարարվել: «Հետախուզման գործի շրջանակում ոստիկանական խմբերը մեկնել են նրա հավանական գտնվելու վայրեր: Համացանցում հետախուզվողի՝ հանձնվելու պատրաստակամության մասին ուղերձի հայտնվելու հետ կապված 2 օր առաջ նրա ազգականներին են փոխանցվել մեր աշխատակիցների հեռախոսահամարները: Սակայն մինչ օրս ոչ ոք կապ չի հաստատել»,- հայտնել է Սադուբաեւը:
«Ղազախստանի ՆԳՆ-ում երաշխավորում են գործի օբյեկտիվ, բազմակողմանի քննություն եւ քաղաքացի Գուրուրյանին խորհուրդ տալիս ծանրացուցիչ հանգամանքների առաջացումից խուսափելու համար կամավոր հանձնվել ոստիկանության աշխատակիցներին: Քննության ընթացքը Ղազախստանի ՆԳՆ հատուկ հսկողության տակ է»,- հավելել է նա:
Նշենք, որ համացանցում է հայտնվել կասկածյալի տեսաուղերձը:
Հիշեցնենք, որ հունվարի 1-ին մի քանի երիտասարդներ Ամանորի տոնակատարության ժամանակ ռեստորանում վեճի էին բռնվել։ Ծեծկռտուքի հետեւանքով դանակի վնասվածքից փողոցում մահացել էր Կարագանդայի 23-ամյա բնակիչ։ Միաժամանակ, քննությամբ պարզվել էր, որ տարբեր վնասվածքներով բուժհաստատություն էին դիմել 24-ից մինչեւ 27 տարեկան 3 տղամարդիկ: Ավելի ուշ հայտնի էր դարձել, որ նրանցից երկուսին տուն են ուղարկել, նրանք ամբուլատոր բուժում են ստանում: Կիրակի՝ հունվարի 6-ին Կարագանդայի մարզի ակիմ Երլան Կոշանովը հանդիպել էր ծեծկռտուքի հետեւանքով մահացածի ազգականներին եւ խոստացել մեղավորներին պատժել:
Կարագանդայում սպանության համար հետախուզվող հայը պատրաստ է հանձնվել Ղազախստանի իշխանություններին․ ԶԼՄ