Երեկվանից առաջին խումբը ժամանել է կենտրոնական հավաքական՝ զորակոչվելու համար: Այս մասին այսօր՝ հունվարի 8-ին, Կենտրոնական հավաքակայանում լրագրողների հետ զրույցում ասաց ՀՀ զինվորական կոմիսար, գեներալ-մայոր Հենրիկ Մուրադյանը:
«Վիճակահանություն կլինի ու 17:00-ից հետո զինծառայողներին կուղեկցեն իրենց կանխորոշած զորամասեր: Հիմնական աշխատանքներն իրականացնում ենք դիմավորման կետում, մանդատային հանձնաժողովում, ուսումնական զորամասերի համալրման գործընթացում եւ բժշկական փորձաքննությունում:
Այս զորակոչի ընթացքում ունենք մեկ առանձնահատկություն՝ պաշտպանության նախարարի հրամանով կանոնակարգված է, որ ժամկետային զինծառայողները, նրանք, ովքեր կցանկանան, իրենց հետ կարող են ունենալ բջջային հեռախոսներ: Կա մեկ պայման, կան սահմանափակումներ՝ բջջային հեռախոսներով նկարահանումներ չիրականացվեն»,- ըւնդգծեց Մուրադյանը:
Ըստ նրա՝ նրանք, ովքեր ունեն լուրջ առողջական խնդիրներ, անպայման ստուգվում են՝ հասկանալու համար պիտանի՞ են զինվորական ծառայության, թե ոչ. «Եթե կան լուրջ առողջական խնդիրներ, տալիս ենք տարկետումներ՝ վեց ամիս, մեկ տարի եւ երեք տարի, որ համապատասխան բուժումից հետո զորակոչվեն բանակ»,-ասաց նա՝ հավելելով, որ անցած տարի 422 երիտասարդ առողջությունը վերականգնելուց հետո զորակոչվել է բանակ:
«Եթե նախկինում տվել ենք տարեկետումներ, հիմա փորձաքննում ենք եւ զորակոչից հետո վերջնական թվերը կներկայացնենք ձեզ»,.-ասաց նա:
«Տարեցտարի ազգաբնակչության շրջանում մեծանում են սրտանոթային հիվանդությունները, ալերգիաները, մաշկային հիվանդությունները. Բավական աճ կա պարբերական հիվանդությունների մասով»,- նշեց Հենրիկ Մուրադյանը: